На Мазырскім НПЗ здарыўся пажар

Гарэла ўстаноўка, пабудаваная расейскім падрадчыкам.

Мінулай ноччу ратавальнікі выязджалі на Мазырскі нафтаперапрацоўчы завод. Паведамленне аб пажары паступіла а 23-41, інфармуе МНС Беларусі. Узгаранне здарылася пасля «разгерметызацыі фільтра камбінаванай усталёўкі гідракрэкінгу цяжкіх нафтавых рэшткаў». Гэта новая ўстаноўка - яна яшчэ не ўведзеная ў эксплуатацыю, на ёй яшчэ праводзяцца пусканаладачныя работы, адзначылі ў МНС.

Пажар ліквідаваны, пацярпелых няма. Тэхналагічны працэс прадпрыемства не парушаны. Прычыны пажару высвятляюцца.

Раней дзяржаўныя СМІ адзначалі, што «будаўніцтва комплексу гідракрэкінгу цяжкіх нафтавых рэшткаў (H-Oil) – самы маштабны праект у інвестыцыйным і вытворчым плане за ўсю гісторыю прадпрыемства». Кошт праекта ацэньвалі на $1,4 млрд. Генпадрадчыкам выступіла ТАА «Маммут Рус» з РФ.