Украіна прапануе ўвесці санкцыі супраць юрыдычных асоб з Беларусі

Працэс папаўнення спісу прадпрыемстваў для ўвядзення санкцый працягваецца.

Бюро эканамічнай бяспекі Украіны вызначыла і ўзгадніла з дзяржаўнымі органамі 23 юрыдычныя асобы, звязаныя з Расеяй і Беларуссю, якія рэкамендуе ўключыць у санкцыйны спіс. Пра гэта 27 верасня паведамляе «Гордон» са спасылкай на прэс-службу БЭБ.

Кошт актываў гэтых кампаній, уключаных у спіс БЭБ, складае больш за 1 млрд грн, у тым ліку больш за 90 млн грн наяўных сродкаў на банкаўскіх рахунках і 160 аўтамабіляў на суму 220 млн грн.

У спіс патрапілі кампаніі-імпарцёры аўтамабільнай прадукцыі, шкла, фармацэўтычнай прадукцыі, аптовы пастаўшчык паліва, дарожна-будаўнічая кампанія, вытворца бытавой хіміі.

Аналітыкі БЭБ устанавілі, што кампаніі знаходзяцца пад кантролем РФ і Беларусі, а іх дзейнасць забяспечвае фінансаванне дзяржаў-агрэсараў праз выплату падаткаў у бюджэты РФ і Беларусі. Гэта, адзначылі ў БЭБ, стварае «рэальныя і патэнцыйныя пагрозы нацыянальным інтарэсам, нацыянальнай бяспецы, суверэнітэту і тэрытарыяльнай цэласнасці Украіны».

Пасля ўзгаднення пераліку юрыдычных асоб рабочай групай спіс будзе перададзены Кабінету міністраў Украіны для накіравання ў Раду нацыянальнай бяспекі і абароны Украіны для ўжывання санкцый.

Са слоў дырэктара БЭБ Вадзіма Мельніка, юрыдычныя асобы, якія ўвайшлі ў спіс БЭБ, прапанавана пазбавіць права карыстацца і распараджацца прыналежнымі ім актывамі. Таксама для іх будзе заблакаваная магчымасць вываду капіталу за межы Украіны і спыненае выкананне іх эканамічных і фінансавых абавязацельстваў перад РФ і Беларуссю.

«Гэта толькі першы пералік такіх кампаній, працэс папаўнення спісу прадпрыемстваў для ўвядзення санкцый працягваецца. Яшчэ два спісы з 25 і 54 суб'ектамі гаспадарчай дзейнасці, якія БЭБ рэкамендуе ўключыць у санкцыйныя спісы, згаджаюцца з адпаведнымі органамі», - распавёў ён.