Святлана Ціханоўская расказала пра вынікі паездкі на Генасамблею ААН

«Голас беларусаў быў пачуты».

З 20 да 26 верасня ў Нью-Ёрку праходзіць 77-я сесія Генеральнай Асамблеі ААН. «Беларускую дэлегацыю» на ёй прадстаўляе міністр замежных спраў Уладзімір Макей, аднак у мерапрыемствах з нагоды Генасамблеі ўдзел брала і Святлана Ціханоўская. «Зеркала» папрасіла яе расказаць пра ўражанні і сустрэчы на Генасамблеі.

Святлана Ціханоўская расказала, што для яе галоўнае, што «голас беларусаў быў пачуты».

- Мы атрымалі ўсе сустрэчы, аб якіх прасілі, і больш. Падыходзілі людзі з розных дэлегацый, пыталіся: «А гэта вы прадстаўляеце Беларусь? Мы вас ведаем і падтрымліваем». Я хачу сказаць усім беларусам: пра нас з вамі не забылі. Ведаюць і пра нашу барацьбу за свабоду. Розныя краіны спрабуюць нам дапамагчы хто як можа. Раней мне здавалася, што вялікія і магутныя арганізацыі кшталту ААН могуць усё: спыніць вайну ці тэрор. Але на жаль, гэта не так. Таму мы і павінны выкарыстоўваць кожную магчымасць і кожны шанц.

Ціханоўская адзначае, што падчас Генасамблеі ААН у яе было шмат сустрэч. Яна ўдзельнічала ў дзвюх міністэрскіх дыскусіях - яны тычыліся палітычнага крызісу ў Беларусі і правоў дзяцей у нашай краіне.

- У кожным выступе я казала пра палітвязняў, пра нашу падтрымку Украіны, чаму трэба падзяляць беларусаў і рэжым. У кулуарах Генасамблеі сустрэлася з высокапастаўленымі прадстаўнікамі ААН. Яны распавялі, што пры арганізацыі створаная даследчая група, якая збірае доказы злачынстваў рэжыму Лукашэнкі. Спадзяюся, што ЗША, Вялікая Брытанія, Нарвегія, Ірландыя і Албанія як чальцы Рады бяспекі паднімуць пытанне Беларусі ў Радзе бяспекі ААН. Ёсць тры галоўныя тэмы: захоп самалёта Ryanair, саўдзел рэжыму ў вайне, размяшчэнне ядзернай зброі ў Беларусі.

З лідарамі Польшчы, Літвы, Латвіі і Эстоніі мы размаўлялі аб тым, каб супраць беларусаў не быў уведзены візавы бан. Нас пачулі, але працэс праверак будзе ўзмоцнены. Гэтая забарона павінна тычыцца найперш чыноўнікаў, сілавікоў, прапагандыстаў, якія падтрымліваюць рэжым і вайну.

З генеральным сакратаром Рады Еўропы мы абмеркавалі фармат Кантактнай групы па сувязях з Беларуссю. Насамрэч гэта беспрэцэдэнтны крок, калі краіну будзе прадстаўляць не ўрад, а прадстаўнікі грамадзянскай супольнасці і дэмакратычнага руху.

Размаўляла з двума намеснікамі дзяржсакратара ЗША Блінкена - гаварылі пра Украіну і Беларусь, я падзякавала за падтрымку грамадзянскай супольнасці. Я дакладна сказала: Беларусь не павінна стаць разменнай манетай у перамовах аб міры і бяспецы. Мне было важна пачуць, што ЗША дакладна падзяляюць рэжым і беларускі народ. Таксама сустрэлася з генеральным сакратаром Google Сундарам Пічам і з віцэ-прэзідэнтам Meta. Я папрасіла падтрымаць беларускіх блогераў і журналістаў, таксама казала аб падтрымцы беларускай мовы і лакалізацыі сэрвісаў, - пракаментавала Ціханоўская.

Акрамя гэтага, яна дадала, што ёй не ўдалося перасекчыся з расейскай дэлегацыяй, а з украінскай яны «размінуліся».