СБУ знайшла расейскага палкоўніка, які загадваў катаваць украінцаў у Херсоне

Акупант карыстаецца пазыўным «Альфа».

СБУ высветліла асобу расейскага палкоўніка паліцыі, які аддаў загад катаваць украінцаў у часова акупаваным Херсоне. Гаворка ідзе пра намесніка начальніка ўправы Расгвардыі Растоўскай вобласці Аляксандра Навуменку з пазыўным «Альфа».

Пра гэта паведамляе прэс-служба СБУ.

Са звестак следства СБУ, з сакавіка Навуменка кіруе вайскоўцамі Расгвардыі і прадстаўнікамі незаконных узброеных фармаванняў РФ у часова акупаваным Херсоне. На ягоныя загады адбываюцца незаконныя затрыманні і катаванні мясцовых жыхароў, пранікненне ў іх дамы і завалоданне маёмасцю.

Высветлілі, што ён браў удзел у разгоне мірных мітынгаў у Херсоне. Аддаваў загады выкарыстоўаць супраць украінскіх грамадзян святлогукавыя гранаты і слёзацечны газ. Сярод херсонцаў былі пацярпелыя.

Акрамя таго, на ягоныя загады расейскія вайскоўцы выкралі двух украінцаў і некалькі тыдняў жорстка іх катавалі. Яны спрабавалі выбіць з іх інфармацыю аб вайскоўцах УСУ і іх месцах дыслакацыі, а таксама схілялі да супрацоўніцтва з акупантамі, паведамілі ў СБУ.

Цяпер палкоўніку Навуменку абвешчана падазрэнне паводле ч. 1 арт. 438 (парушэнне законаў і звычаяў вайны) Крымінальнага кодэкса Украіны.