Дадалося яшчэ чатыры накірункі: расейцы прадаўжаюць раскупляць квіткі пасля абвяшчэння мабілізацыі

Ужо няма месцаў на наўпроставыя рэйсы ў сталіцы блізкага замежжа.

Расейцы прадаўжаюць раскупляць квіткі ў іншыя краіны пасля таго, як крамлёўскі дыктатар Уладзімір Пуцін абвясціў мабілізацыю ў РФ.

Пра гэта паведамляе выданне «Верстка» ў сваім Telegram-канале.

Бліжэй да поўдня паводле маскоўскага часу з продажу зніклі наўпроставыя квіткі з Масквы ў Ташкент, Баку, Бішкек і Астану.

Варыянты з перасадкамі яшчэ ёсць, зазначае выданне.

Раней паведамлялася, што пасля звароту Пуціна расейцы раскупілі ўсе наўпроставыя квіткі на 21 верасня ў Стамбул і Ерэван.

21 верасня Пуцін абвясціў частковую мабілізацыю ў Расеі і заявіў, што падтрымае правядзенне фіктыўных «рэферэндумаў» з мэтай анэксіі акупаваных тэрыторый Украіны.

Напярэдадні Дзярждума РФ увяла ў Крымінальны кодэкс паняцці «мабілізацыя», «ваеннае становішча», «узброены канфлікт». Цяпер у Расеі будуць стражэй караць за дэзерцірства, нез'яўленне на службу і добраахвотную здачу ў палон.