У Польшчы ў рацэ Одра вылавілі больш за дзесяць тонаў мёртвай рыбы

Чысціць раку эколагам дапамагае войска.

Больш за дзесяць тонаў мёртвай рыбы былі вылаўленыя польскімі эколагамі з ракі Одра ў раёне горада Олава ў Ніжняй Сілезіі. Па гэтай рацэ, якую ў Нямеччыне называюць Одэр, праходзіць мяжа паміж дзвюма краінамі, паведамляе «Еўраньюс».

Правёўшы некалькі тэстаў, спецыялісты высветлілі: у воды Одры патрапіла таксічная субстанцыя, верагодна, з аднаго з прамысловых прадпрыемстваў. Праўда, якая менавіта – пакуль невядома.

Мясцовыя ўлады заклікалі жыхароў рэгіёну не набліжацца да вадаёма і не падпускаць да яго дзяцей і жывёлу, а таксама запатрабавалі знайсці і пакараць вінаватых.

«Мы маем справу з гіганцкай і абуральнай экалагічнай катастрофай. Згодна з першым падлікам шкоды навакольнаму асяроддзю і рыбе, – таму што ў асноўным мы гаворым менавіта пра мёртвую рыбу, – мы гаворым пра страты на некалькі мільёнаў злотых», – адзначыў кіраўнік дзяржагенцтва «Польскія воды» Пшэмыслаў Даца.

Эколагі ўжо высветлілі, што прычынай гібелі рыбы стала не летняя спякота, а хімічнае заражэнне вады: у рацэ быў зафіксаваны вельмі высокі ўзровень кіслароду, што азначае магчымае траплянне ў яе хімікату з моцнымі акісляльнымі ўласцівасцямі.

Раней паведамлялася, што ў спробах, узятых у Одры 28 ліпеня, быў знойдзены мезітылен, але ў пазнейшых пробах яго ўжо не было.

Чысціць раку эколагам дапамагае войска.