Як менчукі адпачываюць на пляжы, дзе нельга купацца

Рэпартаж з паўднёвага берага Чыжоўскага вадасховішча.

Пляцоўку на паўднёвым беразе Чыжоўскага вадасховішча пад назвай «Спякота» афіцыйна прэзентавалі ў мінулым сезоне. Праўда, здарылася гэта ў верасні, калі спякотнае надвор'е ўжо спала. Участак пабудавалі на месцы сотак прыватнага сектара, заклалі дарожкі і сцяжынкі, травяны бераг засыпалі пяском, каб у наведвальнікаў узнікла адчуванне «пляжнага адпачынку». Гэтую тэму падтрымліваюць лежакі, пляцоўкі для пляжнага футбола і валейбола, фотазона і розныя дэкаратыўныя элементы. Шкада толькі, што купацца забаронена, пра што папярэджваюць шыльдачкі, піша onliner.by.

«Спякота» ўзнікла ў Чыжоўцы не проста так. «Штогод кожны «Зеленбуд» павінен уладкаваць месца рэкрэацыі каля якога-небудзь воднага аб'екта - такое даручэнне ад горада», - так тлумачылі ў раённай арганізацыі. Першапачаткова меркавалася, што тут размесцяцца выязны гандаль стрытфудам, пункт пракату ровараў (побач якраз праходзіць веладарожка). Але пакуль не склалася, людзі прыходзяць «са сваім».

Для дзяцей устанавілі гульнявы комплекс, для дарослых — воркаўт-зону. Ёсць футбольная, валейбольная і баскетбольная пляцоўкі. Аднак, мяркуючы па здымках, аншлагу там не назіраецца. А вось шэзлонгі не пустуюць.

Асобная тэма - забарона на купанне. Дзеці мочаць ножкі ў вадзе, але купальнікі ў гараджан павінны заставацца сухімі. Таварыства ратавання на вадзе дбае, размясціла тут сезонны выратавальны пост. Не забыліся і нагадаць пра штраф у 3 базавыя велічыні.

Адным словам, на «Спякоце» калі і можна прымаць ванны, то толькі сонечныя.

Мяркуючы па назіраннях фатографа, людзі гэтае правіла шануюць. А вось качкі - не: мусіць, чытаць не ўмеюць.