У Расеі спыніўся найбуйнейшы завод вытворчасці другаснага свінцу

Няма экспарту.

У Расеі спыніўся самы буйны завод вытворчасці другаснага свінцу Фрэгат. Аб гэтым піша выданне «Коммерсантъ» са спасылкай на крыніцы і само прадпрыемства.

Паведамляецца, што расейскі Мінпрамгандаль не выдаў прадпрыемству ліцэнзію на экспарт свінцу, а ўнутраны попыт на яго вельмі нізкі. Пры гэтым, завод Фрэгат штогод выпускае да 40 тысяч тон свінцу - блізу чвэрці ад усяго аб'ёму вытворчасці свінцу ў РФ. З пачатку года завод паспеў выпусціць крыху менш за палову гадавога аб'ёму металу.

Са слоў суразмоўцаў газеты, Мінпрамгандаль хацеў з дапамогай ліцэнзавання перамагчы саматужных перапрацоўшчыкаў старых свінцова-кіслотных акумулятараў, аднак яго патрабаванні да пастаўшчыкоў насілі празмерны характар.

Усяго ў Расеі свінец выпускаюць некалькі дзясяткаў заводаў. Сярод буйных, акрамя Фрэгата-Разцветмет, Экарусметал, Аграпрыбор і УГМК. Са слоў суразмоўцаў выдання, частка прадпрыемстваў на мяжы поўнага прыпынення, некаторыя сышлі ў пазапланавы рамонт.

Усяго ў РФ вырабляецца амаль 200 тысяч тон другаснага свінцу за год. Ільвіная дзель свінцу прадаецца за мяжу, хоць на сусветным рынку дзель РФ - блізу 6%.

Са слоў суразмоўцаў выдання, Еўразвяз пакуль не адмаўляўся ад расейскага металу і экспарт спыніўся толькі праз праблем з выдачай ліцэнзій. Аднак, згодна з пятым пакетам санкцый, ЕЗ забароніць купляць расейскі свінец з 10 ліпеня.

Раней паведамлялася, што суд арыштаваў актывы Мікалаеўскага гліназёмнага завода, звязанага з расейскім алігархам Дзерыпаскам.