У Нідэрландах фермеры заблакавалі парты і супермаркеты

Пратэстоўцы незадаволеныя ўзмацненнем жорсткасці экалагічных нормаў.

У Нідэрландах фермеры ў панядзелак, 4 ліпеня, заблакавалі дыстрыбуцыйныя цэнтры супермаркетаў на знак пратэсту супраць узмацнення жорсткасці экалагічных прадпісанняў. Пратэстоўцы перакрылі пад'язныя шляхі да многіх цэнтраў трактарамі і цюкамі сена. Рыбакі, якія падтрымліваюць фермераў, на знак салідарнасці заблакавалі некалькі партоў, паведамляе DW.

У выніку парушаныя паромныя зносіны амаль з усімі астравамі ў Ватавым моры ў паўночнай частцы Нідэрландаў. Паромныя кампаніі папярэдзілі адпачывальнікаў пра доўгія затрымкі. Цэнтральнае аб'яднанне харчовага гандлю Нідэрландаў назвала дзеянні пратэстоўцаў непрымальнымі, папярэдзіўшы, што гэта можа прывесці да дэфіцыту прадуктаў харчавання ў крамах.

Масавыя акцыі пратэсту

Фермеры, абвяшчаючы аб акцыях пратэсту, выказалі намер "паралізаваць усю краіну". Да блакадаў рыхтуюцца і аэрапорты Нідэрландаў. Пакуль аэрапорты працуюць нармальна. Не паведамляецца пра праблемы і на большасці транспартных артэрый краіны. Паліцыя мае намер умяшацца, калі дэманстранты перакрыюць доступ да міжнароднага аэрапорта Схіпхол пад Амстэрдамам.

За апошнія тыдні фермеры ўжо неаднаразова пратэставалі супраць новых экалагічных прадпісанняў. У некаторых выпадках пратэсты суправаджаліся гвалтам.

На патрабаванне ўладаў, выкіды аксідаў азоту ў атмасферу павінны быць скарочаныя больш чым на 70 адсоткаў. Паводле ацэнак ураду, гэта прывядзе да банкруцтва амаль 30 адсоткаў жывёлагадоўчых гаспадарак. Жывёлагадоўля, паводле заявы ўладаў, з'яўляецца галоўнай прычынай высокіх аб'ёмаў выкіду аксідаў азоту. Вярхоўны суд Нідэрландаў у 2019 годзе пастанавіў, што перавышаць нормы выкіду вокісу азоту больш недапушчальна.