Лукашэнку прыбяруць галодныя чыноўнікі

У найбліжэйшай будучыні дыктатар атрымае вялікае «прывітанне» ад сваіх набліжаных.

Санкцыі супраць беларускага рэжыму даюцца ў знакі значна мацней, чым меркавалі лукашысты. Ім ужо нават няма чым плаціць заробкі, і людзі масава пакідаюць працоўныя месцы. Асабліва моцна церпіць медыцынскі сектар. Ужо цяпер у Менску закрываюцца цэлыя аддзяленні, а на астатніх лекараў раскідваюць абавязкі калег, якія з'ехалі за мяжу. Безумоўна, стаўка ў такім выпадку падвышаецца, але несувымерная з чалавечымі здольнасцямі праца медыкаў змушае кідаць працу і тых, хто застаўся. Бо лекары лепш за іншых разумеюць, што іхняе здароўе занадта каштоўнае, каб яго проста «разбазарваць» на пякельныя ўмовы працы.

Што тычыцца вытворчага сектару, сітуацыя выглядае крыху цікавей. На шэрагу прадпрыемстваў створаныя спецыяльныя камісіі, якія праводзяць прафілактычныя працы з персаналам. Выглядае гэта наступным чынам: раз на тыдзень збіраюць персанал, які падазраюць у нелаяльнасці да рэжыму на асабістыя гутаркі, заводзяць у кабінет, дзе 12 чалавек ладзяць самы сапраўдны допыт, пачынаючы ад падзей 2020 года, заканчваючы стаўленнем да вайны супраць Украіны. Такім чынам прадпрыемствы складаюць спісы непажаданых, якіх можна проста звольніць, а не скарачаць. Натуральна, бо пры скарачэнні яны абавязаныя выплаціць суму роўную як мінімум тром месячным заробкам.

У такіх спробах эканоміць на ўсім рэжым капае сабе яму значна хутчэй. Бо ад колькасці занятых залежаць і пенсійныя выплаты, і штомесячныя падаткі, якія ішлі ў дзяржаўную казну. Сітуацыя, калі і ўтрымаць штат немагчыма, і страціць нельга. Самая сапраўдная пастка, дзе любы іх крок асуджаны на крах.

Наступная праблема – вялізная колькасць абсталявання, якое без належнага абслугоўвання і пры доўгім прастоі пачне гніць. Напрыклад, «Беларуськалій» меў выдатных польскіх партнёраў у пастаўках электраабсталявання і аўтаматыкі. «ГроднаАзот» і «Нафтан» шанавалі нямецкую якасць помпаў і аўтаматыкі. Але без своечасовых планавых рамонтаў, з заменай эксклюзіўных дэталяў, якія робяць толькі вытворцы абсталявання, з цягам часу яно стане экспанатам музея былой вытворчай славы. Практычна на кожным беларускім прадпрыемстве любое абсталяванне або заходняе, або састарэлае савецкае.

Адзіны штат у Беларусі, які не скарачаецца і не звальняецца, – гэта дзяржслужбоўцы. Але іхні заробак наўпрост залежыць менавіта ад дзейнасці вытворчай сферы, бо менавіта яна прыносіла ў казну вялізныя прыбыткі. Чыноўнікі і без таго моцна пацярпелі ад санкцыяў Захаду. Ім стала цяжэй атрымліваць адкаты. Бо пры закупцы абсталявання на Захадзе, якое каштуе мільёны еўраў, некаторыя прымудраліся сабе і лецішча пабудаваць, і машыну абнавіць. Таму на вытворчасцях і ўсталёўвалася аўтаматыка, нават на выведзенае з эксплуатацыі абсталяванне, павялічваючы пры гэтым артыкул выдаткаў.

У найбліжэйшай будучыні Лукашэнка атрымае вялікае прывітанне ад сваіх набліжаных асобаў. Звыклыя жыць на шырокую нагу халуі, як правіла, пачынаюць моцна злавацца, калі мясную выразку мяняюць на касцяны набор. У гэтыя моманты яны становяцца асабліва агрэсіўнымі да гаспадара, які пасадзіў усё на асабістыя амбіцыі.

Арцём Чэрнікаў, спецыяльна для Telegram-канала «Баста!»