FIFA скароціць футбольныя матчы з 90 да 60 хвілін

Гэта не першая навацыя ад Міжнароднай федэрацыі футбола.

Міжнародная федэрацыя футбола (FIFA) і Міжнародная рада футбольных асацыяцый разглядаюць пытанне аб скарачэнні часу матчаў. Замест 90 хвілін яны будуць доўжыцца 60, распавёў былы арбітр Марк Клатэнбург выданню Daily Mail, паведамляе OL.

Праходзіць такія матчы будуць у рэжыме чыстага часу, гэта значыць, па аналогіі з хакеем і баскетболам, калі секундамер спыняюць праз розныя паўзы, што ўзнікаюць падчас сустрэчы.

Экс-арбітр адзначае, што каманды, якія саступілі, стала скардзяцца на неабгрунтавана малую колькасць дададзеных хвілін у якасці кампенсаванага часу. На яго думку, з новым падыходам кожная гульня будзе доўжыцца аднолькавы прамежак чыстага часу, што прыбярэ супярэчнасці.

Клатэнбург прыводзіць цікавую статыстыку: у ангельскай Прэм'ер-лізе ў гэтым сезоне сярэдні час знаходжання мяча ў гульні склаў крыху больш за 55 хвілін. Астатні час матчу пайшоў на паўзы.

Гэта не першая навацыя ад Міжнароднай федэрацыі футбола. У красавіку яна запусціла стрымінгавую платформу FIFA+, на якой плануе трансляваць амаль 40 тысяч матчаў за год.