ЗША павялічылі колькасць войскаў у Еўропе да 100 тысяч

Меры былі прынятыя пасля поўнамаштабнага ўварвання РФ ва Украіну.

Кіраўнік Аб'яднанага камітэта начальнікаў штабоў ЗША Марк Мілі заявіў, што пасля пачатку поўнамаштабнага ўварвання Расеі ва Украіну колькасць амерыканскіх войскаў у Еўропе павялічылася больш як на 30%.

Пра гэта паведамляе CNN.

Падчас брыфінгу пасля онлайн-пасяджэння Кантактнай групы аб Украіне з удзелам міністраў абароны больш як 40 краін Мілі сказаў, што цяпер у зоне аперацый Еўрапейскага камандавання УС ЗША (EUCOM) у многіх еўрапейскіх краінах знаходзяцца 102 тысячы амерыканскіх вайскоўцаў.

Паводле ягоных слоў, з 24 лютага Вашынгтон павялічыў вайсковую прысутнасць на зямлі, на моры і ў паветры. У моры зараз знаходзяцца больш за 15 тысяч амерыканскіх маракоў на 24 вайсковых караблях і падводных лодках, у паветры - 12 эскадрылляў і дзве брыгады баявой авіяцыі. На сушы ЗША разгарнулі два корпусы, дзве дывізіі і шэсць брыгад.