Як хутка здарыцца дэфолт у Беларусі?

Прагнозы міжнародных агенцтваў няўмольныя.

Міжнародныя рэйтынгавыя агенцтвы ацэньваюць доўгатэрміновы крэдытны рэйтынг Беларусі як «пераддэфолтны», нягледзячы на павелічэнне золатавалютных рэзерваў (ЗВР) краіны ў красавіку да 7,76 млрд даляраў, піша выданне «Беларусы і рынак».

Як ідуць справы з ЗВР?

Сітуацыя з рэзервамі Беларусі пасля праблем у сакавіку, у красавіку бягучага года стабілізавалася: паводле звестак Нацбанка РБ міжнародныя рэзервовыя актывы Беларусі павялічыліся ў красавіку ў параўнанні з сакавіком на 0,189 млрд даляраў, гэта значыць на 2,5%, і дасягнулі 7,761 млрд даляраў.

У сакавіку яны скараціліся на 0,693 млрд даляраў, але такое значнае зніжэнне рэзерваў тады збольшага тлумачылася тым, што Нацбанк перавёў частку валютных сродкаў у форму, якая фармальна да рэзерваў не належыць, магчыма, баючыся ўвядзення санкцый.

Як паведамілі ў Нацбанку, росту золатавалютных рэзерваў у красавіку, у асноўным, садзейнічала купля ім валюты на Беларускай валютна-фондавай біржы. Акрамя таго, параўнальна нізкімі былі выдаткі на выплату замежнай і ўнутранага дзяржаўнай пазыкі - 0,070 млрд даляраў.

Пры гэтым у красавіку кошт золата ў складзе рэзерваў паменшыўся на 0,046 млрд даляраў (да 3,291 млрд даляраў), а кошт спецыяльных правоў запазычання МВФ скараціўся на 29,6 млн даляраў (да 1,386 млрд даляраў).

Затое рэзервовыя актывы ў замежнай валюце выраслі на 0,284 млрд. даляраў і дасягнулі 3,084 млрд. даляраў. Праўда, іншыя актывы зменшыліся на 0,019 млрд даляраў - да нуля.

Што кажуць рэйтынгавыя агенцтвы?

Рэйтынгавае агенцтва Fitch у канцы красавіка пацвердзіла доўгатэрміновы крэдытны рэйтынг Рэспублікі Беларусь на ўзроўні «CCC». Рэйтынг «ССС» – гэта «пераддэфолтны» рэйтынг.

На думку аналітыкаў Fitch, санкцыі, уведзеныя супраць Беларусі, у спалучэнні з шчыльнай эканамічнай і фінансавай залежнасцю ад Расеі ствараюць значныя рызыкі для макрафінансавай стабільнасці і падвышаюць нявызначанасць што да гатоўнасці і здольнасці Беларусі выконваць свае замежныя абавязанні.

Асаблівую ўвагу агенцтва Fitch Ratings звярнула на разлікі ў еўрааблігацыях.

«Разлікі за суверэнныя еўрааблігацыі павінны рабіцца ў далярах ЗША, а дакументацыя аблігацый не дапускае разлікаў у альтэрнатыўных валютах. Fitch будзе расцэньваць выплату аблігацый у нацыянальнай валюце як дэфолт», - заявілі ў агенцтве.

Аднак у цэлым ЗВР Беларусі даюць магчымасць без праблем абслугоўваць замежную дзяржаўную запазычанасць цягам некалькіх гадоў. Гэта адзначылі і ў агенцтве S&P Global Ratings, піша select.by.

У паведамленні агенцтва сказана, што штогадовыя выплаты замежнай запазычанасці Беларусі прагназаваліся на ўзроўні 2,5-3,5 млрд даляраў - да пастановы расейскага ўрада аб падаўжэнні тэрмінаў выплаты крэдытаў Беларусі, а пасля гэтай пастановы знізіліся да 1,5 млрд даляраў.

Тым не менш, у агенцтве заявілі, што, улічваючы тэхнічныя збоі, мяркуюць, што дэфолт Беларусі за камерцыйную замежную запазычанасць, намінаваную ў далярах ЗША, практычна непазбежны, згодна з рэйтынгавымі вызначэннямі агенцтва.

У агенцтве растлумачылі, у чым яго рэйтынгавыя вызначэнні. У S&P мяркуюць, што калі эмітэнт не можа зрабіць аплату у адпаведнасці з умовамі і ў тэрмін праз санкцыі, то гэта разглядаецца як дэфолт.

Гэта агульнапрынятае разуменне гэтага тэрміна. Але, акрамя таго, у S&P будуць меркаваць, што мае месца дэфолт, калі аплата не робіцца ў валюце, прадугледжанай умовамі абавязання. У агенцтве падкрэслілі, што такая аплата будзе разглядацца як рэструктурызацыя абавязання, і будуць ацэньваць яе, каб вызначыць, ці з'яўляецца гэта дэфолтам.

Акрамя таго, аналітыкі S&P адзначылі, што ўрад Беларусі паведаміў аб цяжкасцях з выплатай у красавіку асноўнай запазычанасці і адсоткаў за яе перад замежнымі крэдытнымі арганізацыямі, у сувязі з тым, што замежныя фінансавыя ўстановы не апрацоўвалі транзакцыі.

З усіх гэтых разваг вынікае: у S&P ведаюць, што ў Беларусі ёсць сродкі для разліку за пазыкі, але ўпэўненыя, што замежныя фінансавыя арганізацыі паспрабуюць забараніць правядзенне разлікаў.

Пасля чаго ўрад Беларусі можа паспрабаваць разлічыцца беларускімі рублямі. Гэтую сітуацыю ў S&P могуць разглядаць як дэфолтам, але таксама могуць яшчэ і падумаць, разглядаць яе як дэфолт ці не.