Прэм'ер Галоўчанка паспрачаўся з Лукашэнкам

Чыноўнікі не ведаюць, як выканаць неадэкватную забарону дыктатара на рост коштаў.

Прэм'ер-міністр Раман Галоўчанка сёння, 6 кастрычніка, на нарадзе эканамічнага блока ўраду паспрачаўся з Лукашэнкам (а заадно – і з кіраўніком Белстата). Яны разышліся ў тым, як утаймаваць разагнаную інфляцыю. Лукашэнка прапанаваў стрымліваць рост коштаў літаральна ўсіх тавараў і паслуг, а прэм'ер перакананы, што «жорсткае коштавае рэгуляванне – не спосаб развязання ўсіх праблемаў», піша zerkalo.io.

Галоўчанка мяркуе, што жорсткае коштавае рэгуляванне не спосаб развязання ўсіх праблемаў. «У 2020–2021 гадах коштавае рэгуляванне ў краіне было значна мякчэйшым, чым цяпер. Пры гэтым інфляцыя і кошты трымаліся ў межах прагнозных параметраў. Рэч не толькі ў гэтым. Можна зарэгуляваць усё да мяжы і атрымаць адваротны эфект», – сказаў Галоўчанка.

«У Беларусі коштавае рэгуляванне самае жорсткае ў СНД і адно з самых жорсткіх у свеце», – дадаў прэм'ер-міністр.

«Раман Аляксандравіч, дазвольце вам нагадаць. Вы прэм'ер-міністр Беларусі, а не Эстоніі. На шчасце. І не Латвіі, і не Літвы. Чаго нам на іх глядзець», – адрэагаваў на словы прэм'ер-міністра Лукашэнкі.

«Я не параўноўваю нас з імі. Я проста хачу данесці да прысутных, што сістэма коштавага рэгулявання ў краіне створаная. Сёлета яе жорсткасць ўзмацнілася ў параўнанні з папярэднімі гадамі», – адказаў Раман Галоўчанка.

Пазней стала вядома, што з 6 кастрычніка ў Беларусі ўводзяць забарону на павышэнне коштаў.

Нагадаем, у Беларусі інфляцыя за студзень – жнівень разагналася да 13,8 адсотка. Урад прагназуе, што паводле вынікаў года яна будзе на ўзроўні 19 адсоткаў гадавых. Раней прагноз быў на ўзроўні 6 адсоткаў гадавых.