«Омікрон» можа даць людзям «суперімунітэт» супраць будучых варыянтаў каранавіруса?

Але ёсць адзін нюанс.

Пра гэта, як піша сайт tvrain.ru са спасылкай на Business Insider, сведчаць папярэднія звесткі даследаванняў.

І хоць існыя вакцыны супраць каранавірусу выявіліся не надта эфектыўнымі для прадухілення новых заражэнняў штамам «омікрон» (вакцыны паказалі добры ўзровень аховы толькі ад цяжкай формы захворвання), людзі, якія захварэлі на ковід пасля вакцынацыі, магчыма, атрымаюць прыемны бонус. Яны, імаверна, будуць абаронены ад будучых варыянтаў інфекцыі лепш, чым тыя, хто проста перахварэў ці толькі прышчапіўся. Навукоўцы называюць гэта «суперімунітэтам».

Што такое «суперімунітэт»

Паводле даследавання навукоўцаў з Арэгонскага ўніверсітэта здароўя і навукі, якое было праведзенае падчас хвалі штаму «дэльта», у людзей можа назірацца істотнае ўзмацненне імунітэту пасля «прарыўной інфекцыі» (так называюць выпадкі, калі захворваюць вакцынаваныя). Гэта пацвярджаюць і нядаўнія звесткі Цэнтра кантролю захворванняў ЗША. З іх вынікала, што сярод людзей з гібрыдным імунітэтам (ад хваробы і вакцыны) колькасць заражэнняў штамам «дэльта» была значна меншай, чым у групах толькі вакцынаваных і толькі перахварэлых. За больш высокі ўзровень аховы гібрыдны імунітэт таксама завуць «суперімунітэтам».

Хоць звестак што да «омікрону» ўсё яшчэ няшмат, даследаванне з Аўстрыі (пакуль не рэцэнзаванае) паказвае, што такая ж заканамернасць можа назірацца і ў новую хвалю. Паводле высноваў навукоўцаў, «суперімунітэт» засцерагаў ад «омікрону» лепш, чым імунітэт, які з'явіўся ў выніку прышчэпкі.

«Суперімунітэт» не азначае канец пандэміі, піша Business Insider. Ён толькі азначае, што некаторыя людзі будуць абаронены ад ковіда лепш, чым іншыя. У кожны момант можа з'явіцца новы варыянт віруса, папярэджваюць навукоўцы.

І ўжо тым больш не варта спрабаваць атрымаць «суперімунітэт» спецыяльна. «Толькі вар'ят можа хацець заразіцца ковідам. Гэта як гуляць з дынамітам», - сказаў CNN доктар Роберт Мэрфі з Медыцынскай школы Файнберга.

Як працуе «суперімунітэт»

«Суперімунітэт» не працуе без вакцынацыі, гэта яго аснова. Сама па сабе натуральная інфекцыя не прынясе нічога, акрамя звычайнага імунітэту, патэнцыйна вялікіх выдаткаў на лекі, рызык цяжкай плыні хваробы і працяглага ковіда.

«Суперімунітэт» узнікае пасля «прабіўных інфекцый». Вакцынаваныя людзі, якія перанеслі інфекцыю падчас хвалі «дэльта»-штаму, выпрацоўвалі антыцелы, якія да 1000% больш эфектыўныя, чым антыцелы, якія выпрацоўваюцца пасля другой прышчэпкі Pfizer, піша Business Insider. «Высокі не толькі ўзровень антыцелаў, але і іх здольнасць нейтралізаваць розныя варыянты віруса», – сказаў выданню суаўтар арэгонскага даследавання Фікаду Тафесе.

Падвяргаючы сваю імунную сістэму ўздзеянню некалькіх варыянтаў аднаго і таго ж віруса, вы, фактычна, паказваеце свайму арганізму, якія формы можа прымаць каранавірус. «Вакцыны былі распрацаваныя на аснове зыходнага штаму, але прарыўныя інфекцыі «дэльта» або «омікрон» даюць вашаму імунітэту дадатковую перавагу з пункту гледжання разнастайнасці антыцелаў», - дадаў Тафесе.

Даследчыкі пакуль сабралі недастаткова звестак, каб у дэталях зразумець, як «суперімунітэт» працуе супраць «омікрона», але Тафесе настроены аптымістычна. «Мы думаем, што людзі, якія перанеслі інфекцыю, якая прабіла імунітэт, будуць мець высокі ўзровень аховы нават ад «омікрона», – сказаў ён і засмяяўся, прадказваючы далейшае развіццё падзей. – Мы кажам, што цяпер гэта «суперімунітэт», дык што ж будзе далей – супер-пупер імунітэт?»