Мэні Пакьяа абвясціў пра сыход з бокса
1- 20.09.2021, 20:47
- 1,750
Налета ён будзе балатавацца на пасаду прэзідэнта Філіпін.
Былы чэмпіён свету ў боксе ў васьмі вагавых катэгорыях Мэні Пакьяа прыняў рашэнне завяршыць кар'еру. Пра гэта ён заявіў YouTube-каналу Toni Talks, паведамляе РБК.
«Мая баксёрская кар'ера скончаная. Я даўно займаюся боксам, і мая сям'я сказала, што гэтага ўжо дастаткова», - заявіў баксёр.
Раней стала вядома, што баксёр будзе балатавацца на пасаду прэзідэнта Філіпін на выбарах, якія пройдуць у 2022 годзе. У якасці кандыдата спартсмена вылучыла кіруючая партыя PDP-Laban (Філіпінская дэмакратычная партыя - «Сіла народа»). Акрамя гэтага з 2016 года спартовец займае пасаду сенатара. Цяпер прэзідэнтам краіны з'яўляецца Радрыга Дутэртэ, але ён удзельнічаць у выбарах ў 2022 годзе ўжо не можа.
Свой апошні паядынак 42-гадовы Пакьяа правёў 22 жніўня. Ён саступіў кубінцу Ёрдэнісу Угасу рашэннем суддзяў у баі за тытул чэмпіёна свету (Super) паводле версіі Сусветнай баксёрскай асацыяцыі (WBA).
Гэта параза стала для яго восьмай у прафесійнай кар'еры. Да гэтага ў апошні раз ён саступаў у ліпені 2017 года аўстралійцу Джэфу Хорн - у баі за тытул чэмпіёна свету паводле версіі Сусветнай баксёрскай арганізацыі (WBO). Усяго за сваю кар'еру баксёр здабыў 62 перамогі (39 - накаўтам) на прафесійным рынгу, яшчэ два паядынкі завяршыліся з нічыйным вынікам.