Знойдзены музычны твор, які паляпшае стан людзей

Медыкі ўпэўненыя, што яго можна будзе выкарыстоўваць у тэрапіі.

Паводле даследавання ў ЗША, саната Моцарта можа супакоіць эпілептычную мазгавую актыўнасць, змяняючы актыўнасць кары лобных доляй, піша «Новое время».

Медыкі ўпэўненыя, што ў перспектыве санату Моцарта для двух фартэпіяна рэ мажор K448 можна будзе выкарыстоўваць у тэрапіі.

Даследаванне 16 пацыентаў, шпіталізаваных з эпілепсіяй, якія не адказалі на лячэнне, умацавала надзеі на тое, што музыку можна будзе выкарыстоўваць для новых неінвазіўных метадаў лячэння.

«Наша галоўная мара - вызначыць антыэпілептычны музычны жанр і выкарыстоўваць музыку для паляпшэння жыцця людзей, якія пакутуюць на эпілепсію, - сказаў Роберт Куан з Дартмуцкага каледжа, суаўтар даследавання.

Саната Моцарта для двух фартэпіяна рэ мажор K448 вядомая сваім уплывам на пазнанне і іншую мазгавую дзейнасць, але даследчыкі ўсё яшчэ спрабуюць зразумець, чаму.

У новай працы навукоўцы з Медыцынскай школы Дартмуцкага каледжа ў ЗША выкарысталі электраэнцэфалаграмы у 16 дарослых добраахвотнікаў з лекава-ўстойлівай эпілепсіяй. Даследчыкі прасілі іх праслухаць розныя музычныя адрэзкі працягласцю ад 15 да 90 секунд, уключаючы санату Моцарта.

Вынікі паказалі, што праслухоўванне санаты Моцарта для двух фартэпіяна рэ мажор (K448), але не нейкага іншага музычнага ўрыўку, прывяло да зніжэння ўсплёскаў электрычнай актыўнасці ў мозгу, звязанай з эпілепсіяй, агулам на 66,5%.

Даследнікі адзначаюць, што найбольшыя скарачэнні назіраліся ў левай і правай лобных долях галаўнога мозгу. Гэта часткі мозгу, якія ўдзельнічаюць у рэгуляванні эмацыйных рэакцый.

Аўтары мяркуюць, што праслухоўванне «Санаты для двух фартэпіяна ў рэ мажоры K448» Моцарта актывуе ў мозгу нейранальныя сеткі, звязаны з пазітыўнымі эмоцыямі ад праслухоўвання музыкі. Актывацыя гэтых сетак зніжае эпілептычную актыўнасць у мозгу

Так званы «эфект Моцарта» стаў прадметам даследавання з тых часоў, як у 1993 годзе навукоўцы заявілі, што ў людзей, якія слухалі K448 цягам 10 хвілін, палепшыліся навыкі прасторавага мыслення. Наступнае даследаванне праверыла ўплыў K448 на розныя функцыі і разлады мозгу, уключаючы эпілепсію.

Але аўтары заявілі, што гэта першая спроба разбіць назіранні, заснаваныя на структуры твора, якую яны апісалі як «арганізаваную кантраснымі меладычнымі тэмамі, кожная з якіх мае сваю асноўную гармонію».

Як і ў папярэдніх даследаваннях, пацыенты не паказалі змяненняў у мазгавой актыўнасці пры ўздзеянні іншых слыхавых стымулаў або музычных твораў, адрозных ад K448, нават тых, якія належаць іх улюбёным музычным жанрам.

Напрыклад, пацыенты ў гэтым даследаванні слухалі 90 секунд працу Вагнера, якая характарызуецца зменай гармоніі, але «без вядомай мелодыі». Праслухоўванне Вагнера не мела заспакаяльнага эфекту, што заахвоціла даследчыкаў засяродзіцца на мелодыі, такой важнай у K448.