Польшча і Літва заклікаюць ЕЗ жорстка адказаць на гібрыдную пагрозу Лукашэнкі

Краіны прынялі сумесную заяву.

Прэм'еры Польшчы і Літвы ў сумеснай заяве заклікалі дзяржавы ЕЗ павялічыць падтрымку Літвы на фоне крызісу з мігрантамі, якія прыбываюць з Беларусі, і ўзмацніць ціск на рэжым Аляксандра Лукашэнкі.

Тэкст сумеснай заявы размешчаны на сайце польскага ўрада.

«Мы асуджаем выкарыстанне рэжымам Лукашэнкі нелегальнай міграцыі як зброі палітычнага ціску на ЕЗ і яго асобныя дзяржавы-сябры. Гэта яшчэ раз дэманструе цынічнасць беларускага рэжыму і дэманструе неабходнасць хуткага адказу і сумесных дзеянняў ЕЗ для развязання гэтага выкліку бяспекі», - гаворыцца ў заяве.

Прэм'еры Польшчы і Літвы адзначаюць, што на ўсходняй мяжы ЕЗ няма прыкмет паляпшэння, а колькасць нелегальных мігрантаў, якія перасякаюць мяжу з Беларуссю, працягвае расці, дасягаючы некалькіх соцень чалавек у дзень.

«У гэтай беспрэцэдэнтнай для нашага рэгіёну сітуацыі Літва і Польшча заклікаюць ЕЗ і яго краіны-сябры працягнуць і ўзмацніць тэрміновую дыпламатычную, фінансавую і тэхнічную падтрымку Літвы ў яе барацьбе са злачыннымі наступствамі рэжыму Лукашэнкі», - заяўляюць прэм'еры.

Таксама яны заклікалі інстытуты ЕЗ выкарыстоўваць усе наяўныя ў іх сродкі, каб як мага хутчэй перакрыць новы шлях нелегальнай міграцыі.

«Акрамя таго, мы заклікаем ЕЗ і яго дзяржавы-сябры выкарыстоўваць гэты імпульс для ўмацавання агульнай палітыкі ЕЗ па міграцыі і выдачы прытулку і перагледзець падыход да аховы мяжы. Мы глыбока перакананыя, што абарона знешніх межаў Шэнгенскай зоны - гэта не толькі адказнасць асобных дзяржаў- сябраў, але таксама агульная адказнасць ЕЗ», - гаворыцца ў заяве.

«Літва і Польшча адзначаюць неабходнасць хуткага і рашучага рэагавання на дзеянні беларускага рэжыму і ўсіх, хто ўдзельнічае ў арганізацыі і садзейнічанні кантрабандзе нелегальных мігрантаў, у тым ліку шляхам пашырэння абмежавальных мер ЕЗ на беларускі рэжым» - адзначылі прэм'еры.