Tesla ўзялася за будаўніцтва дамоў

Электрычнасць у дамы будзе паступаць ад сонечных панэляў на даху.

Tesla бярэ ўдзел у будаўніцтве новага раскошнага жылога комплексу ў штаце Фларыда. Кампанія забяспечыць дахі дамоў сонечнымі батарэямі і ўсталюе станцыі сілкавання для электрамабіляў, піша Business Insider.

У ліпені забудоўшчыкі Panther National дамовіліся з кампаніяй Ілана Маска, што Tesla зоймецца распрацоўкай сістэмы электразабеспячэння ў мікрараёне. Электрычнасць у дамы будзе паступаць ад сонечных панэляў на даху, а назапашваць яе будуць акумулятары Tesla Powerwall. Акрамя таго, у жылым комплексе з плошчай амаль у тысячу гектараў будзе поле для гульні ў гольф, устаноўкай якога займаецца Centaur US Holdings паводле эскізу былога прафесійнага спартоўца Джэка Ніклаўса. А дызайнам будынкаў зоймецца кампанія з Маямі Strang Design.

Аднак гэта не першы раз, калі Tesla супрацоўнічае з забудоўшчыкамі. У ліпені кампанія падпісала кантракт з фірмай Brookfield аб забеспячэнні сонечнымі панэлямі і акумулятарамі спальны раён у горадзе Осцін, штат Тэхас.