Новы ўрад Малдовы прыняў прысягу
- 6.08.2021, 17:08
- 2,268
Урад краіны ўзначаліла Наталля Гаўрыліца.
6 жніўня новы ўрад Малдовы на чале з Наталляй Гаўрыліцай прыняў прысягу. Пра гэта піша Newsmaker (пераклад - «Гордон»).
Цырымонія адбылася ў будынку апарата прэзідэнта ў прысутнасці кіраўніцы дзяржавы Маі Санду.
«Мы ператворым у жыццё задачы для краіны, якія прапанавалі прэзідэнтка на прэзідэнцкіх выбарах 2020 года і партыя «Дзеянне і салідарнасць» на парламенцкіх выбарах 2021 года. Мы будзем самааддана і ўпарта працаваць над ачышчэннем дзяржаўных устаноў ад злодзеяў і карупцыянераў... Мы будзем працаваць над стварэннем працоўных месцаў, каб дзяржаўныя інвестыцыі ў самыя кароткія тэрміны прыносілі рэальныя вынікі для грамадзян і каб кожны мог убачыць у сваёй сям'і, у сваім населеным пункце і ў грамадстве глыбокія пераўтварэнні, якіх ён чакае», - заявіла новы прэм'ер краіны.
Новы ўрад на пасяджэнні 6 жніўня зацвердзіў парламент Малдовы.
28 красавіка Санду распусціла парламент краіны. 15 красавіка КС Малдовы разгледзеў запыт Санду, у якім прэзідэнтка Малдовы прасіла суд канстатаваць абставіны, якія дазваляюць распусціць парламент. КС пастанавіў, што падстава для роспуску парламента - немагчымасць сфармаваць урад.
Пазачарговыя парламенцкія выбары ў Малдове прайшлі 11 ліпеня. Большасць галасоў атрымала партыя «Дзеянне і салідарнасць» (52,8% галасоў), якую заснавала Санду.