Што будзе ў Беларусі з коштамі здымных кватэр гэтай восенню?

Меркаванне экспэрта.

За жоўтымі палямі ўжо можна разглядзець восень (хоць лепш, вядома, туды не ўзірацца). Да канца месяца ў Менск пачнуць вяртацца студэнты, якія ўжо актыўна шукаюць сабе здымныя кватэры. Калісьці гэта выклікала сур'ёзны ажыятаж на рынку арэнднай нерухомасці, цэны скакалі ўгару, добрых кватэр не заставалася. Але ў апошнія гады сітуацыя змянілася. «Онлайнер» спытаў у аналітыка «Тваёй Сталіцы», чаго нам чакаць у гэтым сезоне.

Што адбывалася з коштамі за апошнія паўгода?

Намеснік начальніка аддзела кансалтынгу і аналітыкі ГК «Твая Сталіца» Андрэй Чарнышоў мяркуе, што больш справядліва адказваць на гэтае пытанне, падзяліўшы рынак арэнды на тры сегменты: «эканом», «стандарт» і «элітны».

«Эканом» - самы стабільны з іх. За апошні час кошт такіх кватэр не змяніўся, і нават каранавірус на іх не паўплываў. Магчыма, найбліжэйшым часам кошт такіх кватэр таксама не зменіцца.

«Стандарту» з красавіка стала прыкладна на 10-15% больш. Экспэрты звязваюць зніжэнне попыту з ад'ездам з краіны IT-спецыялістаў, паслоў, забяспечаных людзей. Магчыма, да канца года такое жыллё патаннее, аднак будаваць прагнозы ў цяперашняй сітуацыі няпроста.

Арэндадаўцы элітнага жылля нядрэнна скінулі цэны ў красавіку гэтага года: кватэры коштам $700-800 патаннелі ў некаторых выпадках на $100 паводле курсу. Аднак з тых часоў сітуацыя не змянілася, і ў агляднай будучыні наўрад ці будзе мяняцца: занадта вузкая сфера.

Ці будзе сёлета студэнцкі бум?

Не – з досведу спецыялістаў, ён бы ўжо пачаўся.

- У гэтым пытанні я б прапанаваў абапірацца на досвед 2018-2019 гадоў (2020-ы быў нетыповым і браць яго за аснову бессэнсоўна). У гэтыя гады «бум» пачынаўся яшчэ ў сярэдзіне ліпеня, бо большасць студэнтаў і іх бацькоў пачыналі шукаць жыллё загадзя.

Што ж тычыцца гэтага года, то запытаў стала больш, але гэта ніяк не паўплывала на рынак. Усе плаўна і роўна.

Якія мы бачым прычыны? Па-першае, сёння інтэрнаты даюць ледзь не ўсім ахвотным. Па-другое, у 2020 годзе некаторыя замежныя студэнты з'ехалі праз каранавірус і сітуацыі ў краіне агулам. Ёсць падставы меркаваць, што частка з іх так і не вярнулася. Сёння ад замежных студэнтаў запытаў практычна няма.

Таму, на маю думку, сёлета павышэння попыту ўжо не будзе. Кошты «студэнцкіх» кватэр расці таксама не павінны: для гэтага патрэбныя эканамічныя абгрунтаванні.

Адзінае, што я мог бы параіць студэнтам, - не кляваць на вуды агенцтваў, якія патрабуюць папярэднюю аплату і ўжо пасля даюць нумары тэлефонаў. Часта такія агенты даюць адрасы ўжо здадзеных ці ўвогуле не існых кватэр. Звязвацца з такімі сапраўды не варта, - распавядае Андрэй Чарнышоў.