У Менску ля метро «Акадэмія навук» збіраюцца зносіць гаражы, дзе мясцовыя жыхары захоўваюць свае аўто
11- 6.08.2021, 14:43
- 10,412
Спее бунт.
Адна з самых прынадных менскіх тэрыторый - пляцоўка плошчай 28,5 га каля станцыі метро «Акадэмія навук» - зазнае значную трансфармацыю, піша «Онлайнер».
Сёння Менгарвыканкам зацвердзіў чарговы горадабудаўнічы праект дэталёвага планавання, які закране зямлі, абмежаваныя праспектам Незалежнасці - вуліцай Сурганава - мяжой тэрыторыі Батанічнага саду. Дакумент быў складзены яшчэ ў траўні 2021-га, але толькі сёння набыў максімальную легітымнасць і быў апублікаваны на партале parvo.by.
Да чаго ж цяпер рыхтавацца людзям, якія ўжо жывуць у гэтым раёне? Нагадаем: у 2018-м, калі праводзілася грамадскае абмеркаванне будучых у квартале змяненняў, менчукам, якія жывуць каля самой станцыі метро «Акадэмія навук», удалося абараніць свой двор і не дапусціць будаўніцтва ўшчыльняльнага прыватнага медцэнтра.
Як відаць з прыведзенага ў дакуменце плана, з ідэяй узвядзення медцэнтра гарадскія ўлады ад менчукоў усё ж адсталі. Тады што ж? Як і планавалася раней, без зносу не абышлося.
Гаражы і складскія памяшканні, якія арандуе дом гандлю «Першамайскі», будуць сцёртыя з твару зямлі.
І калі са старымі, непрывабнымі складамі ўсё зразумела і наўрад ці па іх хто-небудзь будзе гараваць, то вось уладальнікі гаражоў (некаторыя з іх вельмі дыхтоўныя) не факт, што лёгка пагодзяцца з такім паваротам падзей. Відавочна, наспявае новы канфлікт. Праўда, калі падчас грамадскага абмеркавання яшчэ можна было ўносіць прапановы і на нешта ўплываць, то цяпер нібыта усё вызначанае.
Аб зносе гаражоў у дакуменце гаворыцца: «У адпаведнасці з прынятымі Дэталёвым планам пастановамі прадугледжваецца павелічэнне жылых тэрыторый за кошт зносу боксавых гаражоў з наступным добраўпарадкаваннем тэрыторыі». У адной з табліц таксама прыводзяцца дакладныя лічбы: цяпер жылыя тэрыторыі (шматкватэрная забудова) займаюць 4,8 га, а падрастуць на 16,8% за кошт далучэння зямлі пад гаражамі і складамі.
Будаваць на вызваленай зямлі нічога не будуць: прынамсі, да 2030-га ўсе тэхніка-эканамічныя паказчыкі захоўваюцца ў ранейшых межах: ні метра не дададзена.
Характэрна, але пункцірам «пад знос» на плане пазначаныя і два гатэлі каля парку Чэлюскінцаў - тыя самыя, якія нядаўна цалкам рэканструявалі, уклаўшы немалыя грошы, і ў якіх цяпер жывуць прыезджыя ў Менск спартоўцы.
Што яшчэ новенькага: «менсктрансаўская» цягавая падстанцыя, размешчаная паблізу жылых дамоў, да 2023 будзе «ізаляваная»: яе абліцуюць шумаахоўнымі матэрыяламі або зусім начыняць больш сучасным абсталяваннем, каб не гула, не вібравала і не замінала жыць людзям. Пасля рэалізацыі гэтых мерапрыемстваў санітарна-ахоўная зона будзе скарочаная з 60 да 30 метраў.
Рэалізаваць плануюць і раней задуманае: на рэканструяванай тэрыторыі САК «Алімпійскі» пабудуюць гатэль на 250 месцаў (акурат на месцы двух знесеных) і шматфункцыянальны грамадскі цэнтр. На месцы вялікай платнай плоскаснай стаянкі ўзвядуць паркінг на 560 машына-месцаў з падземнымі паверхамі яшчэ на 200 месцаў. У комплексе з новымі адміністрацыйна-дзелавымі памяшканнямі і кавярнямі будзе ісці таксама адкрытая наземная аўтастаянка на 160 машына-месцаў з закрытым паркінгам на 200 месцаў. І гэта яшчэ не ўсе месцы для захоўвання транспарту, у перспектыве іх будзе яшчэ больш.
Усё гэта плануюць паэтапна рэалізаваць да 2030 года. А пасля становіцца яшчэ цікавей: да квартала збіраюцца падвесці чацвёртую галінку метро і адкрыць станцыю «Дом Друку». Таксама на перспектыву прадугледжанае будаўніцтва транспартнага тунэлю, які праходзіць пад захаваным адрэзкам вуліцы Акадэмічнай, пад праспектам Незалежнасці і 1-й лініяй метрапалітэна, пад добраўпарадкаванай тэрыторыяй студэнцкага гарадка БНТУ, пад вуліцай Я. Коласа. Перад вуліцай Куйбышава тунэль выйдзе на паверхню і злучыцца з існай трасай вуліцы Сурганава. Шырыня праезнай часткі транспартнага тунэлю прынятая 8,5 × 2 + 2,0 м. Па захоўванаму адрэзку вул. Сурганава паміж уездам у тунэль прадугледжваецца рух грамадскага пасажырскага і мэтавага транспарту.