Мігранты ўжо начуюць у падземных пераходах Менска?

Фотафакт.

Падпісант ТГ-канала «Беларусь галаўнога мозгу» даслаў фота, зробленае сёння раніцай у падземным пераходзе каля гатэля Юбілейная ў Менску. Ён напісаў, што пад коўдрай варушыліся людзі.

«Мы не можам сцвярджаць, што на фота - нелегалы. Аднак і выключаць імавернасць таго, што неўзабаве яны запоўняць беларускія гарады, мы таксама не можам: літоўцы масава вяртаюць іх назад у Беларусь, ці ёсць у людзей магчымасць паляцець на радзіму (рэйсы з Менска пакуль не скасаваныя) або арэндаваць сабе на час жыллё - невядома.

Відавочна, што састарэлы тэрарыст канчаткова страціў сувязь з рэальнасцю і гатовы абрынуць на краіну ўсялякія беды. Таму мы заклікаем вас быць уважлівымі», - піша ТГ-канал.

Нагадаем, з 3 жніўня Літва вяртае ў Беларусь нелегальных мігрантаў, якіх затрымліваюць на агульнай мяжы.

Дзякуючы гэтаму колькасць выяўленых мігрантаў у Літве значна ўпала. Ужо 4 жніўня літоўскія памежнікі затрымалі 19 чалавек, а выправадзілі больш за 300 мігрантаў. Да гэтага колькасць мігрантаў, якія незаконна перайшлі беларуска-літоўскую мяжу, пабіла ўсе рэкорды 2 жніўня затрымалі 214 чалавек, а днём раней - 294 чалавекі.

5 жніўня Лукашэнка заявіў, што з гэтага часу «ніводная нага на тэрыторыю Беларусі з сумежнага боку ступіць не павінна» - і даручыў сілавікам узмацніць працу аховы мяжы.