Raiffeisen Bank пацвердзіў увядзенне санкцый супраць фінансавай сістэмы Лукашэнкі

Кіраўніцтва банка вельмі ўважліва сочыць за сітуацыяй у Беларусі.

Днямі ў аўстрыйскіх СМІ з'явілася інфармацыя, што Raiffeisen Bank International абмежаваў супрацоўніцтва з дзяржаўным «Беларусбанкам» праз санкцыі супраць Беларусі. Напрыклад, выданне Die Presse піша, што RBI больш не будзе ажыццяўляць міжнародныя пераводы для беларускага дзяржбанка.

Журналісты Onliner спыталі ва ўсіх зацікаўленых старон, ці так гэта, і што мае на ўвазе ўвядзенне санкцый.

«Адзіная заходнееўрапейская крэдытная арганізацыя ў Беларусі робіць першыя высновы з палітычнай сітуацыі ў краіне. У будучыні Raiffeisen Bank International больш не будзе ажыццяўляць міжнародныя пераводы для «Беларусбанка», - піша аўстрыйскае выданне. Die Presse таксама сцвярджае, што Raiffeisen увёў такія абмежаванні праз санкцый супраць Беларусі.

Мы звярнуліся ў прэс-службу беларускага-аўстрыйскага «Прыёрбанка», 87,74% акцый якога належаць банку Raiffeisen, з пытаннем, ці паўплываюць гэтыя санкцыі на стасункі з «Беларусбанкам».

- «Прыёрбанк» не каментуе гэту пастанову. Па дадатковую інфармацыю рэкамендуем звяртацца непасрэдна ў Raiffeisen Bank International, - адказалі ў прэс-службе.

А вось у RBI пацвердзілі ўвядзенне «усіх санкцый для Беларусі», але канкрэтыкі даць не змаглі праз банкаўскую таямніцу.

- Праз аўстрыйскі закон аб банкаўскай таямніцы мы не можам даваць каментары пра асобных кліентаў. Тым не менш мы можам зрабіць вам заяву аб агульнай палітыцы RBI ў дачыненні да санкцый: RBI вельмі ўважліва сочыць за сітуацыяй у Беларусі і неадкладна ўвёў у дзеянне усе магчымыя санкцыі. Нашы ўнутраныя правілы пастаянна карэктуюцца з улікам рызык. Гэтыя правілы дазваляюць нам ацэньваць рэлевантнасць санкцый з улікам рызык «у кожным канкрэтным выпадку» для кліентаў і бізнэсу, - растлумачылі Onliner у прэс-службе Raiffeisen Bank International.

Таксама Onliner пацікавіўся ў «Беларусбанка», што азначаюць гэтыя санкцыі і ці адаб'юцца яны на кліентах банка. У банку адмовіліся каментаваць гэтую сітуацыю.

Нагадаем, тры банкі - «Беларусбанк», «Белаграпрамбанк» і «Белінвестбанк» - раней трапілі пад сектаральныя санкцыі Еўразвязу.