У Польшчы з 15 траўня скасуюць маскавы рэжым на вуліцы

Маскі на вуліцы можна будзе не насіць пры ўмове захавання дыстанцыі.

Урад Польшчы прыняў пастанову аб скасаванні маскавага рэжыму на адкрытым паветры з 15 траўня. Адпаведная пастанова апублікаваная 6 траўня ў «Часопісе законаў», піша gordonua.com.

Пастанова ўрада будзе дзейнічаць мінімум да 5 чэрвеня. Пасля гэтага яно будзе перагледжаная ў залежнасці ад развіцця эпідэмічнай сітуацыі ў Польшчы.

Маскі на вуліцы можна будзе не насіць пры ўмове захавання дыстанцыі паміж людзьмі мінімум 1,5 м. У той жа час, яе трэба насіць у закрытых памяшканнях і грамадскім транспарце.

У канцы красавіка міністр аховы здароўя Польшчы Адам Нядзельскі анансаваў скасаванне нашэння масак на адкрытым паветры пры ўмове, што ўзровень заражэння каранавірусам на 100 тысяч чалавек апусціцца ніжэй за 15. У апошнія дні гэты паказчык складае прыблізна 13 выпадкаў на 100 тысяч насельніцтва.

У другой палове красавіка ў Польшчы пачалі аслабляць кавідныя абмежаванні. З 19 красавіка ў Польшчы адкрыліся яслі, дзіцячыя садкі і адкрытыя спартыўныя аб'екты. З 26 красавіка пачалі гібрыднае навучанне школьнікі 1-3 класаў. Таксама працуюць салоны прыгажосці, цырульні і касметычныя салоны. З 4 траўня ў краіне адкрыліся гандлёвыя цэнтры, мастацкія галерэі і музеі.

Як паведамляецца на сайце ўрада Польшчы, з 15 траўня рэстарацыі змогуць прымаць наведвальнікаў на адкрытых пляцоўках, з 29 траўня - і ў памяшканнях, з запаўненнем, не большым за 50% месцаў. З той жа даты дазволяць арганізацыю вяселляў і іншых урачыстасцяў з удзелам не больш чым 50 гасцей.