Foreign Policy: Блінкен ва Украіне выканаў адразу дзве задачы

У Расеі скончыліся рычагі ўплыву.

Калі Дзяржсакратар ЗША апошнім разам наведваў Украіну, працэс імпічменту і ўсе непрыемнасці, звязаныя з ім, былі ў цэнтры ўвагі. Дзярждэпартамент таксама тады ўцягнулі ў скандал вакол Дональда Трампа і яго пастановы замарозіць вайсковую дапамогу для ўкраінскага войска, каб прымусіць Кіеў пачаць расследаванне супраць Джо Байдэна і ягонай сям'і.

Тагачасны дзяржсакратар Майк Пампэа звольніў пасла Уільяма Тэйлара на некалькі тыдняў раней, каб проста не сустракацца з ім у Кіеве. Пампэа быў адным з самых лаяльных да Трампа чальцоў амерыканскага ўраду. І ён не хацеў трапіць на фота, дзе будзе стаяць побач з ключавым сведкам у справе аб імпічменце, - піша Foreign Policy (пераклад - unian.net).

Крыху больш чым праз год у Кіеў прыехаў новы дзяржсакратар Энтані Блінкен. І гэта быў адзін з першых ягоных афіцыйных замежных візітаў на пасадзе, падчас якога ён правёў сустрэчы з шэрагам украінскіх чыноўнікаў.

«Яго першай задачай, са слоў чыноўнікаў ЗША і Захаду, было пацвердзіць падтрымку Украіны ў вайне супраць расейскіх сілаў. І гэты сігнал стаў востра неабходным пасля таго, як Масква ў мінулым месяцы сцягнула войскі да ўкраінскай мяжы. Яго другая і больш тонкая задача, выкананая за зачыненымі дзвярыма - гэта прадэманстраваць падтрымку ўласным «войскам». Амбасада ЗША ў Кіеве працуе без амбасадара больш за два гады», - піша выданне.

Кар'ернага дыпламата Мары Ёванавіч адклікалі з украінскай сталіцы праз кампанію атачэння Трампа, якая перарасла ў скандал. Тэйлар, які калісьці таксама быў паслом ва Украіне, сказаў Foreign Policy, што ўся сага імпічменту «вельмі дрэнна паўплывала на мараль усёй дыпламатычнай службы».

І ва Украіне гэта было асабліва адчувальна. На думку Тэйлара, візіт Блінкена можа дапамагчы выправіць сітуацыю. Ён сказаў, што пасольства ў Кіеве разам з паверанай у справах Крысцінай Квін сутыкнуліся з надзвычайнымі выклікамі, якіх няма ў большасці амерыканскіх амбасадаў.

«І не толькі праз папярэднюю адміністрацыю, але і праз тое, што яны ў краіне ў стане вайны. Працаваць у амбасадзе ў краіне, якая вядзе вайну, - гэта цяжкая праца, кожны аспект працы пад вельмі сур'ёзным напругай», - растлумачыў Тэйлар.

У чацвер паміж перамовамі з украінскімі чыноўнікамі Блінкен правёў віртуальную сустрэчу з работнікамі амбасады ЗША ў Кіеве. Дзярждэпартамент дагэтуль спрабуе па магчымасці праводзіць падзеі онлайн праз COVID-19.

У красавіку Расея сцягнула дзясяткі тысяч жаўнераў да ўкраінскай мяжы, а таксама марскія сілы ў Чорнае мора, апраўдваючы гэта «вайсковымі вучэннямі». Гэта ўстрывожыла Украіну і Захад, якія западозрылі, што напраўду Крэмль рыхтуе новае ваенны наступ, каб выпрабаваць характар Джо Байдэна і Уладзіміра Зяленскага. Заходнія дыпламаты мяркуюць, што візіт Блінкена ў Кіеў паслаў своечасовы сігнал Маскве аб тым, што ёй варта перагледзець свае мэты.

«Дэлегацыя ЗША прыязджае і кажа: мы на баку Украіны. Гэта азначае, што расейскім вайскоўцам трэба лічыцца з гэтым», - сказаў амбасадар Эстоніі ва Украіне Каіма Кууск.

Хоць напружанне крыху зменшылася, Расея ўсё яшчэ не адвяла ўсе свае войскі ад мяжы. Гэта азначае, што цэлы спектр пагроз усё яшчэ навісае над Кіевам.

«Усё яшчэ існуе рэальная пагроза для паўднёва-ўсходняй Украіны, якая паступае з Чорнага мора. Пуцін адчувае, цісне і даследуе, каб убачыць, чаго ён можа дасягнуць. Калі яму супраціўляюцца, ён хоць бы адступае», - сказаў Тэйлар.

Пасол Эстоніі заўважыў, што мірныя перамовы паміж Кіевам і Масквой зайшлі ў тупік. А канфлікт апынуўся ў падвешаным стане. Расея выкарыстоўвае вайсковую мабілізацыю, каб паспрабаваць запалохаць Украіну і вярнуць сабе ўплыў.

«У Расеі скончыліся рычагі ўплыву. Што ў яе ёсць? Карупцыйныя грошы ці грубая сіла. Але ў выпадку цяперашняй улады ва Украіне, здаецца, карупцыйныя грошы не спрацоўваюць», - сказаў Кууск.