ЕЗ падтрымае працу ў прыцягненні да адказнасці лукашысцкіх злачынцаў

Вінаватыя павінны быць пакараныя.

Еўразвяз падтрымае палітычна і фінансава працу Міжнароднай платформы для Беларусі ў прыцягненню вінаватых да адказнасці (International Accountability Platform for Belarus), гаворыцца ў заяве вярхоўнага прадстаўніка Еўразвязу ў замежнай палітыцы і палітыцы бяспекі Жазэпа Барэля, піша сайт naviny.by.

«Пасля фальсіфікацыі прэзідэнцкіх выбараў сем месяцаў таму беларускія ўлады дапусцілі непрымальныя парушэнні правоў чалавека ў дачыненні да беларускага народа, - сказаў ён. - На масавую мірную мабілізацыю беларускага грамадства, якое выступае за дэмакратыю і свае асноўныя свабоды, улады адказалі жорсткімі рэпрэсіямі, адвольнымі арыштамі і затрыманнямі, сотнямі задакументаваных выпадкаў катаванняў і іншых жорсткіх, бесчалавечных ці прыніжаючых годнасць тапаў абыходжання і пакарання, уключаючы сексуальны і гендэрны гвалт. Не справакаваныя, адвольныя затрыманні больш чым 200 мірных людзей па ўсёй Беларусі ўчора з нагоды Дня Волі дэманструюць, што маштабы дзяржаўных рэпрэсій не змяншаюцца. Вінаватыя павінны быць прыцягнутыя да адказнасці».

Са слоў Барэля, ЕЗ разам з міжнароднымі партнёрамі «ўзначальвае барацьбу з беспакаранасцю».

Акрамя падтрымкі працы міжнароднай платформы, адзначыў Барэль, на гэтым тыдні Рада ААН у правах чалавека ўхваліла прапанаваную Еўразвязам рэзалюцыю аб сітуацыі ў Беларусі. Гэты дакумент дае мандат вярхоўнаму камісару ААН у правах чалавека для збору інфармацыі аб парушэннях у Беларусі. Барэль падкрэсліў, што ў сваёй працы вярхоўны камісар ААН будзе карыстацца дакументацыяй, сабранай Міжнароднай платформай.

«ЕЗ будзе і надалей падтрымліваць беларускі народ у ягоным законным імкненні да дэмакратыі і павазе да асноўных свабод, уключаючы права на свабоду слова, мірныя сходы і правядзенне дэманстрацыі, не сутыкаючыся з гвалтам, запалохваннем або страхам рэпрэсій», - сказаў кіраўнік еўрапейскай дыпламатыі.

Міжнародная платформа для Беларусі ў прыцягненні да адказнасці вінаватых у парушэнні правоў чалавека (International Accountability Platform for Belarus) пачала працу 24 сакавіка. «Гэта кааліцыя незалежных праваабарончых арганізацый, якія аб'ядналі свае намаганні для збору, апрацоўкі, праверкі і захавання довадаў сур'ёзных парушэнняў правоў чалавека, у тым ліку катаванняў, учыненых беларускімі ўладамі напярэдадні прэзідэнцкіх выбараў 2020 года і ў наступны перыяд», - гаворыцца ў паведамленні на сайце платформы.

Платформа створаная, каб выканаць рэкамендацыі прафесара Вольфганга Бенедэка, дакладчыка ў рамках Маскоўскага механізму АБСЕ, выкладзеныя ў яго дакладзе Сталай радзе АБСЕ 5 лістапада 2020 года аб меркаваных парушэннях правоў чалавека ў сувязі з прэзідэнцкімі выбарамі ў Беларусі 9 жніўня.

У кіроўны камітэт платформы ўвайшлі Dignity - Дацкі інстытут супраць катаванняў, праваабарончы цэнтр «Вясна», Міжнародны камітэт расследавання катаванняў у Беларусі і праваабарончая арганізацыя Redress, якая дапамагае ахвярам катаванняў.

У складзе кансультацыйнай рады платформы: Еўрапейскі цэнтр канстытуцыйных праў і праў чалавека, Міжнародная федэрацыя ў правах чалавека, Міжнародная рада рэабілітацыі ахвяр катаванняў, Нарвежскі Хельсінскі камітэт, арганізацыя «Лекары за правы чалавека», Сусветная арганізацыя супраць катаванняў.