«Белавія» адключылі ад міжнародных сістэм узаемаразлікаў для авіяперавозак

Што гэта значыць?

«Белавія» адключылі ад сістэмы ўзаемаразлікаў BSP і сістэмы CASS для грузавых авіяперавозак. Пра гэта zerkalo.io паведамілі ў Міжнароднай асацыяцыі паветранага транспарта (IATA).

- Мы пацвярджаем, што авіякампанія «Белавія» была адхіленая ад удзелу ў Праграме IATA ў білінгу і разліках (BSP) і Сістэмы разлікаў у грузавых рахунках (CASS), - паведамілі ў Міжнароднай асацыяцыі паветранага транспарту.

Сістэма BSP уніфікуе фінансавыя і інфармацыйныя плыні, тым самым спрашчаючы працэдуру афармлення і продажу авіяквіткоў як самімі авіякампаніямі, так і агентамі. Яе запусцілі ў 1971 годзе ў Японіі, а цяпер сістэма ахоплівае больш за 370 авіякампаній у 180 краінах свету, праз яе праходзіць амаль 70% ненаўпроставых продажаў квіткоў. У апошнія гады (за выключэннем 2020-га) праз яе прадаецца квіткоў больш чым на 230 млрд даляраў штогод.

Сістэма разлікаў у грузавых рахунках (CASS) прызначаная для правядзення разлікаў паміж авіякампаніямі і экспедытарамі.

Такая пастанова, магчыма, прынятая ў сувязі з прынятымі на мінулым тыдні еўрапейскімі абмежаваннямі. Еўразвяз увёў санкцыі супраць 17 фізічных і 11 юрыдычных асоб, сярод якіх значыцца беларускі авіявознік «Белавія».

Перад прыняццем пятага пакета санкцый гендырэктар «Белавія» Ігар Чаргінец расказваў, што абмежаванні закрануць лізінгавыя кантракты беларускага авіявозніка, таму лізінгавыя кампаніі загадзя запатрабавалі вярнуць частку самалётаў.

Датуль з флоту «Белавія» вывелі як мінімум два Boeing 737-800. Паветраныя судны прыбылі ў Стамбул, дзе «страцілі» беларускую рэгістрацыю EW і здабылі нумары Сан-Марына T7-438 і Ірландыі EI-GYP, пасля чаго іх перагналі ў аэрапорты Вонсдрэхта (Нідэрланды) і Астравы (Чэхія). Авіякампанія пакуль не пацвердзіла гэтую інфармацыю. Раней «Белавія» ўжо адправіла тры свае найноўшыя самалёты Embraer у Казахстан — для бартоў шукалі часовую стаянку.