На Крым абрынуўся магутны ўраган
3- 30.11.2021, 10:46
- 9,068
Ёсць пацярпелыя.
У акупаваным Крыме моцны вецер стаў прычынай падзення дрэў і абрыву правадоў. У выніку пацярпелі шэсць жыхароў паўвыспы, піша korrespondent.net.
"Цяпер паступіла інфармацыя аб шасці пацярпелых: чацвёра ў Ялце, адзін у Алушце, адзін у Сімферопальскім раёне", - інфармуе выданне.
Па ўсёй паўвыспе 56 тысяч чалавек засталіся без святла.
Са звестак "кіраўніка адміністрацыі" Ялты Яніны Паўленкі, у горадзе трое людзей - 16-гадовы хлопчык і 67-гадовыя мужчына і жанчына - траўмаваны ў выніку падзення дрэў. Яны шпіталізаваныя. Яшчэ на аднаго мужчыну, 33 гады, упала сарваная ветрам антэна.
Акрамя таго, на ўзбярэжжы Чорнага мора праз шторм пацярпелі дзесяць аўтамабіляў, чатыры судны сарваліся з якара, адно - затанула.
Так званыя "ўлады" анэксаванай паўвыспы рэкамендавалі працадаўцам арганізаваць дыстанцыйны рэжым працы, а бацькам - не весці дзяцей у школы і дзіцячыя садкі.
Нагадаем, у Крыме абвешчана штармавое папярэджанне з-за ліўняў і ветру. Сіноптыкі папярэджвалі аб ветры хуткасцю да 20-25 м/с, у гарах - да 35 м/с, што па шкале Бафорта ўважаецца за ўраган.
Праз шторм у раёне Керчанскай затокі затрымаліся амаль 200 суднаў.