Праз правакацыі з беларускага боку Польшча перакінула на мяжу дэсантнікаў з Кракава

Ахову ўсходніх рубяжоў краіны ўзмацніла 6-я брыгада ПДВ.

Праз правакацыі з беларускага боку Польшча перакінула на мяжу вайскоўцаў з 6-й паветрана-дэсантнай брыгады, якая дыслакуецца ў Кракаве.

"Салдаты 6-й брыгады гатовы дзейнічаць заўсёды там, дзе яны больш за ўсё патрэбныя", — гаворыцца ў паведамленні камандавання.

Нагадаем, што 8 лістапада рэжым Лукашэнкі зладзіў маштабную правакацыю на польскай мяжы. Тысячы мігрантаў пад кантролем беларускіх спецслужбаў штурмавалі мяжу Польшчы. Польскі бок паведамляе, што ў наступных штурмах мяжы могуць узяць удзел да 10 тысяч нелегалаў.

15 лістапада беларускія вайскоўцы сагналі нелегалаў пад канвоем з іх лагера на мяжы з Польшчай да КПП "Брузгі-Кузніца".

16 лістапада мігранты пайшлі на штурм польскай мяжы.

Пасля гэтага мігрантаў размясцілі ў лагістычным цэнтры "Брузгі" на мяжы. Польская разведка паведаміла, што беларускія сілавікі ператварылі цэнтр "Брузгі" ў базу для нападаў мігрантаў на Польшчу.

26 лістапада Лукашэнка пабываў у лагеры мігрантаў, каб падняць іх на новы штурм польскай мяжы.