Расейскі мастак пра Лукашэнку: Я не збіраюся прысвячаць сваю кар'еру дробнаму дыктатару

У Пецярбургу разбурылі барэльеф з Лукашэнкам у выглядзе Медузы Гаргоны.

З фасада будынка на Пушкінскай вуліцы ў Санкт-Пецярбургу супрацоўнікі камунальных службаў прыбралі барэльеф з тварам Лукашэнкі ў вобразе Медузы Гаргоны. Аб разбурэнні працы выданню «Подъем» распавёў яе аўтар, вулічны мастак Zoom.

Барэльеф правісеў на будынку менш за дзень. Zoom адзначыў, што чакаў разбурэння яго працы, але не думаў, што гэта адбудзецца так хутка. «Тое, што яны падарваліся так хутка, трохі здзівіла. Ну добра, у хуткаплынным жыцці стрыт-арта і ёсць яго хараство», - прызнаўся мастак.

Zoom дадаў, што пакуль не плануе ствараць новыя творы, прысвечаныя Лукашэнку: «У мяне была ідэя, я яе рэалізаваў, яна прагучала. Кропка. Я не збіраюся прысвячаць сваю кар'еру дробнаму дыктатару».

Знішчэнне барэльефа пацвердзілі ў адміністрацыі Цэнтральнага раёна Санкт-Пецярбурга.