Навукоўцы распавялі, як космас уплывае на мозг чалавека

Спецыялісты ацанілі структурную цэласнасць мозгу з дапамогай маркераў крыві.

Навукоўцы з Нямеччыны, Швецыі і Расеі выявілі, што доўгае знаходжанне ў космасе не толькі прыводзіць да атрафіі цягліц і зніжэння шчыльнасці касцей, але і аказвае ўздзеянне на мозг, піша «Вокруг света».

Спецыялісты ацанілі структурную цэласнасць мозгу з дапамогай маркераў крыві ў пяці касманаўтаў, якія вярнуліся пасля працяглай місіі. У сярэднім яны знаходзіліся на борце Міжнароднай касмічнай станцыі 169 дзён. Касманаўты здавалі кроў непасрэдна перад палётам, адразу пасля вяртання на Зямлю і праз адзін і тры тыдні пасля прызямлення.

Навукоўцам атрымалася выявіць прыкметы пашкоджання і паскоранага старэння мозгу. Ва ўзорах крыві было выяўлена істотнае падвышэнне ўтрымання некалькіх спецыфічных для мозгу бялкоў, што паказвае на пашкоджанне нервовых валокнаў у белым рэчыве. Таксама значна павялічылася канцэнтрацыя бэта-амілойда, прычым змены захоўваліся на працягу трох тыдняў пасля завяршэння місіі.

«Нашы вынікі паказваюць на лёгкае, але працяглае пашкоджанне галаўнога мозгу і патэнцыйна паскораную нейрадэгенерацыю», - адзначыў адзін з аўтараў даследавання Петэр цу Эйленбург (Peter zu Eulenburg).

Навукоўцы ўважаюць, што змены звязаныя з пераразмеркаваннем спіннамазгавой вадкасці ва ўмовах мікрагравітацыі.