Польшча дапусціла ўвядзенне нацыянальных санкцый супраць рэжыму Лукашэнкі
8- 28.09.2020, 20:48
- 18,690
Варшава заклікала ЕЗ як мага хутчэй увесці санкцыі супраць афіцыйнага Менска.
Калі Еўразвяз не ўвядзе санкцый у дачыненні да беларускіх чыноўнікаў, то суседнія з Беларуссю краіны ЕЗ могуць разгледзець магчымасць увядзення санкцый на нацыянальным узроўні, заявіў у панядзелак міністр замежных спраў Польшчы Збігнеў Раў, паведамляе Reuters.
Выступаючы на прэс-канферэнцыі ў Будапешце, Раў выказаў надзею, што ЕЗ неўзабаве зможа дасягнуць кансэнсусу ў пытанні санкцый, якія, з яго слоў, неабходна ўвесці праз «відавочнае парушэнне правоў чалавека» ў Беларусі.
«Гэтае пытанне было адкладзенае праз пярэчанні аднаго з сябраў ЕЗ, але мы вернемся да гэтага на форуме ЕЗ», - сказаў Раў пасля сустрэчы з міністрам замежных спраў Вугоршчыны Петэрам Сіярта.
Кіпр заблакаваў план ЕЗ па ўвядзенні санкцый супраць Беларусі праз сваю спрэчку з Турцыяй.
Гэта паставіла ЕЗ у няёмкае становішча, падкрэсліўшы, наколькі лёгка можа быць паралізаванае прыняцце пастаноў у такіх галінах, як замежная палітыка, дзе патрабуецца аднадушнасць усіх 27 краін-сябраў.
Польшча, якая мяжуе з Беларуссю, хоча, каб ЕЗ прапанаваў Менску фінансавую дапамогу сумаю не менш як 1 мільярд еўраў (1,18 мільярда даляраў) у рамках «Плана Маршала» па аднаўленні краіны і зніжэння яе залежнасці ад Расеі.