Лінкявічус: Улады Беларусі страцілі права што-небудзь падпісваць ад імя народа

Кіраўнік МЗС Літвы заклікаў увесці санкцыі супраць афіцыйнага Менска.

Кіраўнік МЗС Літвы Лінас Лінкявічус спадзяецца, што пытанне ўвядзення санкцый у дачыненні да службовых асоб у Беларусі не будзе зацягвацца асобнымі чальцамі Еўразвязу. Пра гэта ён заявіў 21 верасня ў Брусэлі журналістам перад пачаткам пасяджэння рады, піша сайт naviny.by.

«Я спадзяюся, што нашы калегі з ЕЗ не будуць трымаць Еўразвяз у падвешаным стане і не возьмуць у закладнікі, бо надышоў момант дзейнічаць», - сказаў Лінкявічус.

Гаворка, магчыма, ідзе пра Кіпр, які, як раней паведамляла агенцтва Bloomberg, блакуе прыняцце пастановы аб санкцыях у дачыненні да беларускіх чыноўнікаў, адказных за фальсіфікацыі выбараў і рэпрэсіі ў дачыненні да мірных дэманстрантаў.

Лінкявічус таксама адзначыў, што акрамя ўвядзення санкцый, ЕЗ павінен надаць падтрымку беларускай грамадзянскай супольнасці і незалежным СМІ.

«Людзі ўсё яшчэ пакутуюць, пакуль мы з вамі тут размаўляем, яны ўтрымліваюцца пад вартай, зазнаюць катаванні, згвалтаванні. Гэта, безумоўна, заслугоўвае не толькі нашай увагі, але і незалежнага міжнароднага расследавання», - сказаў кіраўнік МЗС Літвы.

«Таксама варта вельмі выразна сказаць якія ўладам, што яны страцілі права казаць, вызначаць ці нешта падпісваць ад імя беларускага народа, што, магчыма, Лукашэнка плануе зрабіць, - сказаў Лінкявічус. - Таксама вельмі важна сказаць аб недапушчальнасці ўмяшання ва ўнутраныя справы Беларусі. Гэта стала б моцным і выразным сігналам для Расеі не рабіць гэтага».