Зламысніка, які захапіў банк у Кіеве, затрымалі

Украінскія сілавікі правялі спецаперацыю ў бізнэс-цэнтры.

Сілавікі затрымалі зламысніка, які пагражаў падарваць аддзяленне банка ў цэнтры Кіева. Пра гэта паведаміў намеснік кіраўніка МУС Антон Герашчанка ў Facebook. Інфармацыю таксама пацвярджаюць у СБУ, піша «УНІАН».

«Тэрарыст захоплены жывым. Выбуху не адбылося. Далей суд і доўгае турэмнае зняволенне», - напісаў Герашчанка ў Facebook.

Са слоў Герашчанкі, цяпер на месцы інцыдэнту працуюць выбухатэхнікі. Пасля пра затрыманне на брыфінгу паведаміў намеснік кіраўніка СБУ Сяргей Пунь. «Аперацыя праведзеная паспяхова. Зламыснік затрыманы», - заявіў ён.

Нагадаем, сёння ў Кіеве невядомы мужчына захапіў памяшканне банка і пагражаў выбуховым рэчывам.