Стачкам «Гродна Азота» распавёў, як будуць спыняць прадпрыемства

«Гродна Азот» - адно з найбуйнейшых хімічных прадпрыемстваў Беларусі.

«Прыпыненне такога прадпрыемства, як «Азот» не адбываецца імгненна. Спыняць будзем як трэба», - распавёў hrodna.life прадстаўнік аднаго з цэхавых стачкамаў Вадзім Венскі. 19 жніўня працоўныя і адміністрацыя прыйшлі да пагаднення - завод спыняць, калі страйк падтрымаюць 2/3 працоўных. Цяпер працаўнікі завода збіраюць звесткі ў цэхах і службах.

«Калі кіраўніцтва кажа, «вы завод узарвяце», крыўдна становіцца, што яны зусім не ведаюць рабочых, не вераць у сваіх людзей», - кажа Вадзім Венскі.

«Нам кажуць, што цэхі нельга спыняць, што гэта бесперапынная вытворчасць. Але ўсякае абсталяванне калі-небудзь заканчвае працу. Ёсць прыпыненне на рамонт, абслугоўванне або дэмантаж. Тэхнолагі, інжынеры і працоўныя ведаюць, як гэта зрабіць бяспечна. У нас ёсць схемы аварыйнага і планавага вываду абсталявання з эксплуатацыі», - кажа сябра страйкаму.

Абсталяванне на «Азоце» працуе бесперапынна. Паводле звестак АУНА на будаўніцтва новага азотнага комплексу, цэхі аміяку разлічаныя на 350 дзён эксплуатацыі за год. Астатнія дні адводзяцца для тэхнічнага абслугоўвання і планавых рамонтаў.

Яшчэ 18 жніўня стачкам і працоўныя абмяркоўвалі розныя варыянты пратэсту, не звязаныя з прыпыненнем вытворчасці. Гэта вывад абсталявання на рамонт, адмова ад выплаты падаткаў або ўнёскаў у фонд сацыяльнай абароны, прыпыненне транспартнага цэха і спыненне адгрузкі гатовай прадукцыі. Многія супрацоўнікі выйшлі з афіцыйнага прафсаюзу. Група незалежнай прафсаюзнай арганізацыі з пачаткам пратэстаў вырасла з 22 чалавек да 200.

«Пра страйк цяпер усе кажуць. Частка людзей гатовыя ісці да канца, іншыя сумняваюцца. Ёсць тыя, хто выступае супраць. Людзі маюць права на розныя меркаванні і гэта права трэба паважаць. Кіраўніцтва то палохае нас канкурэнцыяй і санкцыямі за зрыў паставак, то цісне на жаль, што ўвесь завод застанецца без заробку. Але мы цяпер у такой сітуацыі, што нічога не застаецца, акрамя забастоўкі. Нам кажуць, «тры дні ўжо міліцыі на вуліцах не было, чаго вы яшчэ хочаце? А мы хочам поўнай адстаўкі Лукашэнкі».