«Пуціна ў адстаўку!»: У Хабараўску прайшла масавая акцыя пратэсту супраць арышту губернатара

Расейскія рэгіёны ўсё часцей дэманструюць непадпарадкаванне Маскве.

У цэнтры Хабараўска прайшла акцыя пратэсту супраць арышту губернатара Сяргея Фургала. Пасля шэсця па вуліцах натоўп сабраўся каля адміністрацыі Хабараўскага краю і запатрабаваў, каб да іх выйшлі прадстаўнікі ўлады, паведамляе ВВС. Людзі, якія сабраліся скандавалі: «Пуціна ў адстаўку!»

Як развіваліся падзеі

Мяркуючы па відэатрансляцыі з месца падзей, спачатку ў шэсці па цэнтральных вуліцах горада ўзялі ўдзел некалькі тысяч чалавек. Пратэстоўцы ішлі па праезнай частцы. Паліцыі не было відаць.

Людзі скандавалі лозунгі «Свабоду!», «Фургал - наш выбар!», «Гэта наш край!» і «Мы тут улада», у некаторых у руках былі плакаты, у тым ліку «Я/Мы Фургал». Значная частка пратэстоўцаў выйшла на вуліцу ў масках.

Па перыметры цэнтральнай плошчы Леніна былі выстаўленыя папярэджанні аб «дэзінфекцыйных мерапрыемствах у сувязі з прафілактыкай каранавіруса», але пратэстоўцы ўсё ж такі прайшлі за агароджы, піша Znak.com. Шматлікія аўтамабілі побач з плошчай гучна сігналілі.

Пасля шэсця пратэстоўцы запоўнілі цэнтральную плошчу. Мяркуючы па кадрах трансляцыі, частка ўдзельнікаў акцыі спрабавала ўвайсці ў будынак адміністрацыі Хабараўскага краю, іншыя ж крычалі: «Нельга чапаць дзверы!»

Ля ўваходу дзяжурыла паліцыя. Натоўп пачаў скандаваць: «Пуціна ў адстаўку!» і «Ганьба Маскве!»

Людзі, якія сабраліся запатрабавалі, каб да іх выйшлі прадстаўнікі ўлады. Праз некаторы час на прыступкі адміністрацыі выйшла прэс-сакратар Фургала Надзея Томчанка. Яна падзякавала ім за падтрымку і сказала, што ў адміністрацыі таксама «ашаломленыя» тым, што адбылося з губернатарам.

Яшчэ адзін чыноўнік сказаў, што бараніць правы трэба ў рамках прававога поля, але натоўп сустрэў гэтыя словы цюгаканнем і скандаваннем: «Ганьба!» Яшчэ больш яго абурылі словы пра тое, што масавая акцыя нясе небяспеку з пункту гледжання пагрозы распаўсюджвання каранавіруса.

Пратэстоўцы выступілі супраць прапановы падпісаць петыцыю ў абарону Фургала і разысціся, зноў пачаўшы скандаваць: «Пуціна ў адстаўку!» Ініцыятыву на мітынгу захапілі маладыя людзі. Менавіта яны сталі выступаць з мегафонам.

Людзі, якія сабраліся запатрабавалі судзіць Фургала ў Хабараўску, а не ў Маскве. Адзін з выступоўцаў узгадаў справу Івана Галунова, крымінальны пераслед якога быў спынены пасля пратэстаў.

«Адзіная светлая пляма ў гэтым змроку была - гэта наш губернатар. І цяпер яго адабралі!» - заявіў яшчэ адзін чалавек, якому далі мегафон. Выступіў і каардынатар штаба Аляксея Навальнага Аляксей Ворсін.

Сярод іншага, выступоўцы падзякавалі паліцыі за тое, што яна не ўмешваецца, зрабіўшы выснову аб тым, што паліцыянты таксама падтрымліваюць тых, хто пратэстуе супраць арышту Фургала.

Пасля затрымання ў Хабараўску губернатара адправілі ў Маскву, дзе яго арыштаваў суд

Фургал быў затрыманы раніцай у чацвер і самалётам дастаўлены ў Маскву. Басманны суд у пятніцу арыштаваў яго паводле справы аб забойствах, учыненых 15 гадоў таму.

Ён стаў кіраўніком Хабараўскага краю восенню 2018 года, перамогшы дзейнага губернатара, якога падтрымліваў Крэмль і «Адзіная Расея». Фургал - сябра ЛДПР.

Паводле версіі следства, хабараўскі губернатар арганізаваў замах на забойства прадпрымальніка Аляксандра Смольскага і забойствы яшчэ двух бізнэсоўцаў - Яўгеніі Зоры і Алега Булатава - у 2004-2005 гадах.

Фургал віну не прызнае. Як паведаміў журналістам адвакат Барыс Кажамякін, падчас судовага паседжання, якое праходзіла ў закрытым рэжыме, Фургал зняпраўдзіў усе абвінавачванні і заявіў пра сваю недатычнасць да інкрымінаваных злачынстваў.

Яшчэ чацвёра фігурантаў крымінальнай справы таксама знаходзяцца пад арыштам. Яны, як сцвярджае следства, далі паказанні на Фургала як на арганізатара злачынстваў.

Фургал застаецца губернатарам. Прэзідэнт Уладзімір Пуцін яшчэ не прымаў пастановы аб адстаўцы, казаў яго прэс-сакратар Дзмітрый Пяскоў.

Пасля затрымання губернатара, у якім бралі ўдзел супрацоўнікі ФСБ, пачаўся збор подпісаў на сайце change.org.

У Камсамольску-на-Амуры жыхары наладзілі шэсце ў падтрымку губернатара Фургала, піша «Медиазона» са спасылкай на паведамленне ў групе ў «Укантакце», дзе выкладзена фота, якое пацвярджае гэта.