COVID-19: надзеі ўскладаюцца толькі на адзін медыкамент

У пачатку пандэміі такіх прэпаратаў было больш.

"У пачатку каранакрызіса вялікія надзеі ўскладаліся на сродкі супраць малярыі, ВІЧ і ліхаманкі Эбола. Зараз усе яны выбылі з гонкі - акрамя аднаго", - піша швайцарскае выданне Tages-Anzeiger (пераклад - inopressa.ru).

Ужо ў пачатку пандэміі сярод лекавых сродкаў у якасці фаварытаў былі вылучаныя некалькі медыкаментаў: лапінавір супольна з рытанавірам ("Калетра"), сродкі супраць малярыі і рэўматоіднага артрыту хларахін і гідраксіхларахін, а таксама рэмдэсівір для барацьбы з ліхаманкай Эбола.

З першапачатковых фаварытаў сёння застаўся толькі адзін медыкамент - рэмдэсівір. "Ён быў распрацаваны для барацьбы з ліхаманкай Эбола, але не паказаў станоўчага эфекту ў даследаваннях. Аднак у выпадку з каранавірусам сітуацыя выглядае лепш. Даклад, апублікаваны на выходных у навуковым часопісе New England Journal of Medicine, дэманструе бадзёрыя вынікі".

"Даследаванне, у якім узялі ўдзел блізу тысячы чалавек, стала найбуйнейшым даследаваннем, у якім рэмдэсівір супаставілі з плацэба. Яго ўжыванне прывяло да таго, што пацыенты ў сярэднім пакідалі шпіталь праз 11 дзён замест 15. У цэлым у колькасці смяротных выпадкаў не было зарэгістравана значнай розніцы. Аднак пацыенты з сярэднім цячэннем хваробы (якія атрымлівалі дадатковы кісларод, але не падлучаныя да апаратаў ШВЛ) пры лячэнні рэмдэсівірам паміралі ў чатыры разы менш, чым пацыенты з групы, якая брала плацэба. Які сапраўдны ўзровень смяротнасці, пакуль невядома. У даследаванні зніжэнне смяротнасці ў параўнанні з плацэба вагалася паміж 40 і 90%".

"Выкарыстанне рэмдэсівіра не дало пераваг у лячэнні шпіталізаваных пацыентаў з адносна слабым цячэннем хваробы (без дадатковага кіслароду), а таксама ў цяжкіх выпадках, калі хворыя мелі патрэбу ў штучнай вентыляцыі лёгкіх. "Калі мы даем медыкамент у зручны момант падыходнаму пацыенту, ён, відавочна, дае станоўчы эфект", - кажа Мануэль Батэгай, інфекцыяніст з універсітэцкага шпіталя Базеля".

Чаканні ад іншых прэпаратаў у сваю чаргу невялікія. Адсутнасць эфекту медыкамента "Калетра" супраць ВІЧ была даказана ўжо ў канцы сакавіка ў рамках рандамізаванага даследавання ў Кітаі на 200 пацыентах. Першапачаткова здагадка, што сродак усё ж можа быць эфектыўным пры прыёме на ранніх стадыях захворвання, не пацвердзілася.

Што да хларахіна і яго аналага гідраксіхларахіна, то шматлікія даследаванні паказваюць на адмоўную прапорцыю карысці і шкоды пры яго выкарыстанні ў лячэнні Covid-19. САЗ таксама перасцерагае ад ужывання гэтых прэпаратаў па-за даследаваннямі, гаворыцца ў артыкуле.

Новай стала і публікацыя ў навуковым часопісе The Lancet. "Аўтары даследавання вывучылі эфектыўнасць абодвух прэпаратаў з дапамогай базы звестак Surgical Outcomes Collaborative, якая аб'ядноўвае інфармацыю з 671 клінікі па ўсім свеце. Пры параўнанні 15 тысяч пацыентаў з Covid-19, якія прымалі гідраксіхларахін або хларахін, з 80 тысяч пацыентамі, якія атрымлівалі іншае лячэнне, высветлілася: пры лячэнні сродкам ад малярыі памірала нават больш людзей, чым у кантрольнай групе, значна часцей сустракаліся і парушэнні сардэчнага рытму".

"Ніводзін з сённяшніх кандыдатаў не мяняе сітуацыю ў корані", - кажа Гюнтхард Хулдрых, намеснік дырэктара Клінікі інфекцыйных хвароб і шпітальнай гігіены пры ўніверсітэцкім шпіталі Цюрыха. Аднак гэта, на ягоную думку, могуць зрабіць створаныя манакланальныя антыцелы да Sars-CoV-2. "Яны могуць блакаваць размнажэнне віруса, - кажа ён. - Аднак буйныя клінічныя даследаванні, магчыма, можна будзе пачаць не раней за пачатак 2021 года", - перадае Tages-Anzeiger.