«Навошта ўздымаць кошты крытычна неабходных тавараў?»
80- 5.04.2020, 17:54
- 55,113
Беларусы абураныя ростам коштаў у крамах.
Жыхарка Слуцка распавяла kurjer.info пра паход у краму і рост коштаў:
- Пайшла сёння ў краму па цытрыны (п'ю ваду з лімонам). Калі ўбачыла кошт, ачмурэла: больш за 11 рублёў. Мінулы раз я набывала за 4 рублі з капейкамі, а сёння мне прапаноўваюць тыя ж лімоны па 11 рублёў. Пытанне: хто падняў кошт у гэтулькі разоў?
Закупачны кошт так імкліва пайшоў угору? Верыцца з цяжкасцю. Міністэрства гандлю адпусціла кошт? Сама сетка ўстанавіла такія надбаўкі? Чаму ва ўмовах пандэміі пачалі значна расці кошты самага неабходнага: сродкаў прафілактыкі і абароны?
Калі мая дачка набывала марлевыя павязкі па 1,50, я падумала: а чаго так дорага? У нас у сям'і 6 чалавек, атрымалася 9 рублёў, каб насіць іх 2 гадзіны (калі паводле правіл). Але калі я даведалася, што гэта не самы дарагі кошт (калегі набывалі па 4.50), то ўвогуле быў шокавы стан.
Што падаражэе далей і, самае галоўнае, хто на гэтым нажываецца? Хай даражэюць яхты, дарагія аўтамабілі і ўсё такога кшталту, хай становяцца яшчэ даражэйшымі - мяне гэта не хвалюе. Я думаю, што і тыя, хто іх набывае, таксама не асабліва пакрыўдзяцца: у іх грошы знойдуцца набыць і даражэй.
Але навошта павялічваць кошты таго, што людзям цяпер неабходнае, каб выжыць у гэтых варунках? Я ж не прадмет раскошы набываю. Наўрад ці гэта прачытаюць тыя, хто наважыў нажыцца на гэтым.
Проста няхай ведаюць, што мы ўсе ходзім пад Богам і нясем адказнасць за свае ўчынкі. Вы можаце нажыцца на бядзе, мажліва, нават станеце багатымі, калі пройдзе пандэмія і ўсё супакоіцца. Проста памятайце, што гэтыя грошы вам могуць не спатрэбіцца. Карму яшчэ ніхто не касаваў.