Нафта па $13: Расея распрадае каштоўнасці

Савудаўская Арабія адкінула расейскіх нафтавікоў у мінулае стагоддзе.

Крызіс на нафтавым рынку, справакаваны пандэміяй каранавіруса і спрэчкамі з Савудаўскай Арабіяй, адкінуў расейскіх нафтавікоў у мінулае стагоддзе.

Са звестак уплывовай аналітычнай кампаніі «Аргус», у Ратэрдаме, адным з сусветных цэнтраў гандлю нафтай, цана за барэль расейскай нафты маркі Юралс з пятніцы ўпала на 3,2 даляра, так што да панядзелка яна каштавала 13 даляраў. Гэта самы нізкі ўзровень з 1999 года. Зніжка на Юралс эталоннай еўрапейскай маркі Брэнт склала 4,75 даляраў, дасягнуўшы максімальнага паказчыка з сярэдзіны 2008 года, піша Gazeta Wyborcza (пераклад - inosmi.ru).

Газпрам ужо не зарабляе ў Еўропе?

Падстава для хвалявання ёсць таксама ў Газпрама. У панядзелак на брытанскім спотавым хабе NBP кошт 1 тысячы кубаметраў газу з пастаўкай у канцы гэтага тыдня апусціўся ніжэй за 78 даляраў, а на галандскай гандлёвай пляцоўцы TTF (найбуйнейшай у Еўропе) - ніжэй за 80 даляраў. Агенцтва «Інтэрфакс» паказвае, што цяпер спотавы кошт газу ў Еўропе ўпаў ніжэй за расейскі ўзровень. У Смаленскай і Ленінградскай абласцях, дзе самыя высокія ў Расеі стаўкі, Газпрам прадае 1 тысячы кубаметраў за 59 даляраў. Калі дадаць да гэтага экспартную мытную (30%), атрымліваецца 85 даляраў, а гэтая лічба перавышае каціроўкі на еўрапейскіх хабах. Таксама варта ўлічваць кошт транспартавання, які складае як мінімум 22 даляры за перасоўванне сыравіны па трубаправодзе на 1 тысячу кіламетраў. Усё гэта азначае, што даход Газпрама ад паставак у Заходнюю Еўропу зараз вельмі малы, магчыма нават, што канцэрн гандлюе сабе ў страту.

Эр-Рыяд наносіць удар па рынку звадкаваных вуглевадародных газаў

Аналітыкі прадказваюць, што цана нафты можа ўпасці яшчэ мацней у красавіку, калі скончыцца дзеянне пагаднення OPEC і Расеі аб скарачэнні аб'ёму здабычы, якое ўклалі з 2017 года для падвышэння каціровак. Тры тыдні таму на саміце ў Вене Масква адхіліла прапанову картэля аб дадатковых скарачэннях. У адказ Савудаўская Арабія, раззлаваўшыся, кінула расейцам выклік і заявіла, што нарасціць у красавіку здабычу больш чым на 20%, а таксама радыкальна знізіць кошт сыравіны.

У панядзелак прадстаўнікі савудаўскага нафтавага гіганта «Савуда Арамка» паведамілі, што яны маюць намер экспартаваць у красавіку прыкладна 10 мільёнаў барэляў нафты за дзень, а ў траўні - 10,6 мільёна барэляў, пазбаўляючыся такім чынам ад лішкаў сыравіны, якія ўтварыліся на Савудаўскім рынку пра пандэміі.

У аўторак Эр-Рыяд падняў планку ў гэтым коштавым канфлікце на нафтавым рынку яшчэ вышэй. «Савуда Арамка» надумаў у красавіку на 50% знізіць экспартную цану на прапан і бутан, гэта значыць на звадкаваныя вуглевадародныя газы, якія выкарыстоўваюцца ў тым ліку для запраўкі аўтамабіляў. Гэта азначае, што Савудаўская Арабія нанясе ўдар па экспарту расейскіх ЗВГ на рынкі Азіі і Блізкага Усходу.

Расея распрадае каштоўнасці

Падзенне нафтавых коштаў абарочваецца скарачэннем даходаў Расеі ў цвёрдай валюце, пакутуе асноўная крыніца даходаў яе бюджэту. У аўторак расейская Дзярждума спехам прыняла закон, які дазволіць ураду ў гэтым годзе павялічыць (практычна без абмежаванняў) аб'ём рэалізацыі каштоўных металаў i каштоўных камянёў з Дзяржфонду, каб кампенсаваць бюджэтны дэфіцыт, узнікнення якога пры больш высокіх цэнах нафты не чакалася.

Гэта, аднак, усяго толькі паўмеры, і расейскія фінансы выратуе толькі падвышэнне нафтавых катыровак.