Вызначаны патэнцыйныя мішэні імуннага адказу на каронавірус

Гэта дапаможа ў распрацоўцы вакцыны.

Навукоўцы з Інстытута імуналогіі Ла-Хоя з дапамогай калегаў з Інстытута Крэйга Вагнера ўпершыню вызначылі магчымыя мішэні імуннага адказу на каронавірус SARS-Cov-2. Як паведамляе Naked science, участкі антыгенаў новага каронавіруса маюць вялікую ступень падабенства з аналагічнымі ўчасткамі ў віруса SARS-Cov, які выклікае атыповую пнеўманію. Гэта можа дапамагчы тым, хто займаецца распрацоўкай вакцыны супраць новага віруса, піша «Зеркало недели. Украина».

Калі імунная сістэма чалавека сутыкаецца з вірусамі або бактэрыямі, яна засяроджваецца на невялікіх участках чужародных антыгенаў, якія называюцца эпітопамі. Па іх «захопнікаў» распазнаюць Т- і В-лімфацыты і да іх далучаюцца антыцелы. Наяўнасць поўнай карты вірусных эпітопаў і іх імунагеннасці (здольнасці выклікаць імунны адказ) важна для спецыялістаў, якія займаюцца распрацоўкай і паляпшэннем вакцын.

На гэты момант, акрамя SARS-Cov-2, у чалавечай папуляцыі цыркулююць яшчэ чатыры каронавірусныя штамы. Яны, як правіла, не выклікаюць цяжкіх хвароб, і ўсе разам адказныя прыкладна за чвэрць сезонных прастудаў. Кожныя некалькі гадоў з'яўляецца новы вірус, які выклікае больш цяжкія захворванні. Так было ў 2002-2003 гадах, у 2015 годзе і адбываецца цяпер.

У ходзе новага даследавання навукоўцы скарысталіся звесткамі базы IEDB, якая ўтрымлівае больш за 600 тысяч вядомых эпітопаў для 3600 розных вірусаў, а таксама інфармацыю з базы Virus Pathogen Resource. Навукоўцы прааналізавалі вядомыя эпітопы штаму SARS-CoV і супаставілі іх з аналагічнымі ўчасткамі антыгенаў SARS-CoV-2.

«Мы змаглі супаставіць 10 В-клеткавых эпітопаў з новым каронавірусам, і дзякуючы агульнай высокай ступені падабенства [антыгенных] паслядоўнасцяў паміж SARS-CoV і SARS-CoV-2, існуе высокая імавернасць таго, што ў гэтых двух штамах адны і тыя ж вобласці з'яўляюцца імунадамінантнымі», - каментуе адзін з аўтараў даследавання Альба Грыфоні.

Пяць падобных эпітопаў былі знойдзены ў атожылках «кароны» віруса, тры - у вірусным нуклеакапсідзе, а яшчэ два - у бялковай абалонцы. Акрамя таго, у шыпавідных атожылках і нуклеакапсідзе навукоўцы выявілі 17 падобных Т-клеткавых эпітопаў.

Навукоўцы адзначаюць, што наяўнасць падобных эпітопаў у дзвюх штамаў каронавіруса з'яўляецца абнадзейлівай інфармацыяй для тых, хто стварае вакцыну.