Літоўская выведка апавяла пра ўтоены інцыдэнт на БелАЭС
38- 4.02.2020, 11:28
- 127,077
Утойванне інфармацыі беларускім бокам падтрымаў «Расатам».
У традыцыйнай справаздачы Дэпартамента дзяржбяспекі Літвы і ваеннай выведкі сказана, што АЭС будуюць насуперак патрабаванням міжнародных стандартаў бяспекі, паведамляе Delfi.
"З набліжэннем вызначанага тэрміну запуску БелАЭС нарастае напружанне паміж адказнымі беларускімі ўстановамі, заказнікамі праекта, і прадстаўнікамі Расатама – усе яны баяцца адказнасці за магчымыя інцыдэнты на пабудаванай у спешцы БелАЭС", – сказана ў справаздачы. У дакуменце БелАЭС – гэта Астравецкая АЭС.
Выведка звярнула ўвагу на тое, што ў ліпені 2019 года з пасады сышоў кіраўнік будаўніцтва станцыі Дзмітрый Раманец.
Літоўская выведка мяркуе, што ён сышоў з пасады, каб "унікнуць адказнасці за інцыдэнты і далейшыя складаныя працы ў падрыхтоўцы станцыі да запуску".
Паводле звестак справаздачы, Беларускі следчы камітэт ужо пачаў расследаванне ў сувязі з інцыдэнтамі на будаўнічай пляцоўцы, у ходзе расследавання былі затрыманыя некалькі чалавек, якія працавалі на расейскага падрадчыка, аднак праз ціск з боку расейскіх дыпламатаў справы былі спыненыя.
У дакуменце сказана, што прадстаўнікі "Расатама" нядбала ставяцца да патрабаванняў беларускіх установаў, якія кантралюць будаўніцтва, а самім беларусам не хапае як кампетэнтнасці, так і волі для жорсткага кантролю.
Паводле звестак выведкі, у канцы чэрвеня мінулага года праз халатнасць дзеянняў працоўных у першым блоку АЭС, побач з рэактарам, пачаўся пажар, аднак беларускія ўстановы не паведамілі пра гэты інцыдэнт.
"Паводле ацэнкі выведкі, утойванне падобнай інфармацыі пра недахопы праекта БелАЭС падтрымлівае Расатам, паколькі баіцца за сваю міжнародную рэпутацыю надзейнага партнёра ў справе ажыццяўлення праектаў будаўніцтва АЭС", – сказана ў дакуменце.
Нагадаем, гэта не першы інцыдэнт на БелАЭС. Будаўніцтва станцыі ў Астраўцы суправаджалася падзеннямі рэактара, гібеллю працоўных і шматлікімі надзвычайнымі здарэннямі. Падрабязную інфармацыю пра будаўніцтва Астравецкай АЭС вы можаце знайсці ў фільме Studio Х97 "Астравец смерці".