Колькасць хворых на каранавірус перавысіла лікі атыповай пнеўманіі 2003 года

Памерлі 132 чалавекі.

Ад пнеўманіі, выкліканай каранавірусом 2019-nCoV, памерлі 132 чалавекі, паведаміла 29 студзеня South China Morning Post (пераклад – gordonua.com).

Паводле звестак уладаў Кітая, колькасць хворых склала 6053 чалавекі, што перавышае статыстыку ў атыповай пнеўманіі, выкліканай вірусам у Кітаі ў 2002–2003 гадах. Тады за дзевяць месяцаў захварэлі 5327 чалавек, загінулі 349.

За межамі правінцыі Хубэй у Кітаі ад новага каранавірусу памерлі шэсць чалавек, большасць загінулых – людзі старэйшыя за 60 гадоў.

Медыкі ў Кітаі мяркуюць, што піку распаўсюджвання каранавірус 2019-nCoV дасягне цягам найбліжэйшых 10 дзён, пасля чаго сітуацыя стабілізуецца. У той самы час спецыялісты ва ўніверсітэце Ганконга мяркуюць, што колькасць тых, хто захварэў у найбуйнейшых гарадах Кітая, дасягне максімуму ў красавіку – траўні.

Упершыню новы тып віруса, які выклікае атыповую пнеўманіі, быў пацверджаны 31 снежня 2019 года ва Ухані ў кітайскай правінцыі Хубэй. Насельніцтва горада складае больш за 11 млн чалавек. Пачатковыя сімптомы захворвання – падвышаная тэмпература і кашаль. На стан 28 студзеня было вядома, што 107 чалавек памерлі, колькасць тых, хто захварэў ва ўсім свеце, перавысіла 4,4 тыс. 63 чалавекі медыкі здолелі вылечыць.

21 студзеня Нацыянальная камісія аховы здароўя Кітая пацвердзіла перадачу каранавірусу 2019-nCoV ад чалавека да чалавека.

23 студзеня ў Сусветнай арганізацыі аховы здароўя паведамілі, што пакуль не будуць абвяшчаць надзвычайную сітуацыю ў галіне грамадскай аховы здароўя, якая мае міжнароднае значэнне. 27 студзеня СААЗ выправіла ацэнку рызыкі каранавірусу 2019-nCoV на глабальным узроўні з "памяркоўнага" на "высокі".

Ва Украіне ні аднаго выпадку заражэння вірусам на стан 28 студзеня не было. Усім, хто прыбыў у аэрапорт Барыспаль з Кітая, вымяраюць тэмпературу.

28 студзеня ў Міністэрстве аховы здароўя Украіны заявілі, што выпадкі каранавірусу, акрамя Кітая, былі зарэгістраваныя ў 12 краінах.