29 лютага 2020, Субота, 6:40
Засталося зусім крыху
Рубрыкі

Самалёт «Белавія» развярнулі, каб зняць з борта беларускіх чыноўнікаў?

29
Самалёт «Белавія» развярнулі, каб зняць з борта беларускіх чыноўнікаў?

З самалёта, які ляцеў з Менска ў Мюнхен, знялі шасцёра пасажыраў.

Як паведамлялася, учора рэйс B2 899 авіякампаніі «Белавія», які вылецеў з Менска ў Мюнхен, развярнуўся над Польшчай і прызямліўся ў аэрапорце Горадні. З самалёта вывелі шасцярых пасажыраў, іх папрасілі забраць з сабой ручную паклажу і багаж, борт абшукалі. Гэтыя шасцёра пасажыраў – хто яны?

Гэтым рэйсам у Мюнхен ляцеў чытач «Онлайнера» Зміцер. Вось што ён распавёў аб тым, што адбылося пасля пасадкі самалёта ў Горадні.

- Увайшлі людзі ў зялёнай форме – хутчэй за ўсё, памежнікі. Яны выклікалі некалькі пасажыраў (шасцярых: двое з адной сям'і, чацвёра — з іншай, калі не памыляюся), вывелі іх з рэчамі на вуліцу. Абшукалі месца, дзе тыя сядзелі. <...> Пасажыраў, якім трэба было выйсці, называлі па прозвішчы. Імаверна, гэта былі муж з жонкай і іх бацькі. Нібыта выводзілі яшчэ чатырох чалавек, але іх потым вярнулі (магчыма, яны былі з маленькімі дзецьмі, але я не ўпэўнены). Выглядалі яны маркотна, што натуральна, але і ў істэрыцы не біліся. Двое былі з адным прозвішчам, чацвёра з другім. Усе названыя людзі перад рэйсам сядзелі разам вялікай кампаніяй, па-мойму, нават выпілі па келіху шампанскага. Але п'янымі не былі.

Чытач у размове з журналістамі ўспомніў прозвішчы, якія называлі людзі ў форме: Руднік і Крыштаповіч.

Паводле непацверджанай інфармацыі, з рэйса B2 899 былі знятыя Пётр Руднік, які са снежня 2008 года да снежня 2014 года займаў пасаду старшыні Магілёўскага абласнога выканаўчага камітэта, а таксама Міхаіл Крыштаповіч, які ўваходзіў у Савет Рэспублікі.

Афіцыйнай інфармацыі аб затрыманні пасажыраў рэйса B2 899 пакуль няма. Авіякампанія «Белавія» і Дзяржаўны памежны камітэт ніяк не пракаментавалі тое, што адбылося.