Вудкрафт: Уважаю, што мы рухаемся ў правільным кірунку

Са слоў настаўніка менскага «Дынама», яму будзе прасцей, калі яго падапечныя зноў прайграюць 12 матчаў запар.

Галоўны трэнер менскага «Дынама» Крэйг Вудкрафт у перадачы «Спорт-кадр» на тэлеканале «Беларусь 5» распавёў, як спраўляецца з ціскам, паведамляе pressball.by.

- Ці чакалі вы, што сезон для «Дынама» атрымаецца такім цяжкім?

- Напэўна ведаў, на што ішоў. Меркаваў, што гэта будзе доўгі і цяжкі працэс. Магчыма, не думаў, што будзе так складана, як ёсць. Але я па-ранейшаму натхнёны і думаю, што мы рухаемся ў правільным кірунку. Часам цяжка знайсці поспех сярод прайграных матчаў, але, паколькі мы аналізуем штодня, бачым паляпшэнні. Гэта натхняе працаваць і рухацца наперад. І калі гэты працэс скончыцца, мы створым тое, чым кожны сёлета зможа ганарыцца.

- Калі-небудзь за кар'еру даводзілася сутыкацца з такімі няўдалымі адрэзкамі?

- Ніколі не даводзілася чакаць перамог так доўга. І нам гэтыя серыі даліся вельмі цяжка. Гэта прымусіла задумацца пра тое, ці правільна мы ўсё робім. Але калі адступіць і паглядзець на рэальнасць, дзе мы знаходзімся, гэта нармальна. Гэта нармальная частка перабудовы, калі не ўсё ідзе гладка. Трэба заставацца адданымі сваёй справе. У цяжкія часы моцныя асобы не адступаюць. Прагрэс многіх гульцоў дае добры стымул для руху наперад.

- Як спраўляецеся з ціскам? Гульцы засмучаныя, няма перамог, фанаты сышлі з трыбун. Маральна цяжка?

- Гэта ўсё на мяне моцна ўплывае. Самае складанае, што я чалавек, і гэта душыць мяне, як і ўсіх у «Дынама». Але я яшчэ і лідар. І таму мне варта прымаць увесь удар на сябе. Я павінен спрабаваць справіцца з усім як чалавек і як лідар, знайсці аптымальнае развязанне. Мне нельга быць засмучаным перад гульцамі. Яны павінны ведаць, што ў мяне ёсць план. І гэты працэс напэўна зробіць мяне лепш. Буду лягчэй разумець псіхалогію гульцоў. Калі каманда будзе ў наступны раз саступаць дванаццаць матчаў запар, мне ўжо будзе прасцей.