Кіроўца тралейбуса: Паглядзеў на час - мінус 300 рублёў за «размову праз тэлефон»

Кіроўца менскага тралейбуснага парка №2 ужо два месяцы спрабуе абскардзіць пастанову кіраўніцтва.

25 ліпеня кіроўцу тралейбуснага парка №2 Менска Паўла Місюкевіча пазбавілі 100% прэміі нібыта за размову праз тэлефон падчас кіравання тралейбусам. Сам Павел сцвярджае, што для гутарак праз тэлефон у яго ёсць bluetooth, а напраўду ён глядзеў дакладны час на тэлефоне, піша praca-by.info.

- 26 чэрвеня я размаўляў праз мабільны тэлефон з выкарыстаннем пры гэтым спецыяльнай гарнітуры. Гэтыя дзеянні не супярэчаць пункту 10.4 ПДР, а менавіта: кіроўцу забараняецца карыстацца «падчас руху транспартнага сродку апаратамі радыё- і тэлефоннай сувязі, не абсталяванымі тэхнічнай прыладай, якія дазваляюць весці перамовы без выкарыстання рук». Перасоўванне мабільнага тэлефона з адной рукі ў іншую не можа з'яўляцца парушэннем пералічаных вышэй правілаў і тым больш пацягнуць пазбаўленне прэміі на 100%, - мяркуе Павел Місюкевіч.

Натуральна, кіроўца не пагадзіўся са стоадсоткавым пазбаўленнем прэміі, а гэта амаль 300 рублёў і абскардзіў загад за подпісам дырэктара філіяла тралейбуснага парка №2 А. Мазго.

23 жніўня кіроўца напісаў заяву ў камісію ў працоўных спрэчках. Павел Місюкевіч прыйшоў на першае паседжанне разам з юрыстам РЭП Юрыем Беляковым. Аднак правага інспектара прафзвязу на паседжанне не пусцілі, бо яно праходзіла на тэрыторыі завода.

10 верасня камісія ў працоўных спрэчках апавясціла кіроўцу, што яго пытанне знятае з парадку дня праз нібыта паўторны непрыход заяўніка.

- Мне незразумелыя дзеянні камісіі ў працоўных спрэчках. Паводле артыкула 62 Канстытуцыі кожны мае права на юрыдычную дапамогу, у тым ліку і Павел Місюкевіч. Кіроўца не знаходзіцца ў галіновым прафзвязе тралейбуснага парка №2, але з'яўляецца чальцом прафзвяза РЭП. Лагічна, што на пасяджэнне КПС работнік прыйшоў з прадстаўніком прафзвязу, якому плаціць сяброўскія складкі. Заўважу, што гэта не першы выпадак, калі кіраўніцтва тралейбуснага парка №2 і старшыня прафкама адмаўляюцца размаўляць са мной як з прадстаўніком прафзвязу РЭП. Такую палітыку адміністрацыі тралейбуснага парка магу патлумачыць толькі адным: яна выдатна разумее, што паступае з Місюкевічам не паводле закона, - адзначае Юрый Белякоў.

Дзяржаўнае прадпрыемства «Мінсктранс», куды Павел Місюкевіч таксама звярнуўся з просьбай правесці адкрытае пасяджэнне КПС, каб развязаць праблему, як выявілася, наогул не мае камісіі ў працоўных спрэчках.

Павел Місюкевіч мае намер далей звяртацца ў Федэрацыю прафсаюзаў Беларусі, куды ўваходзіць галіновы прафсаюз транспартнікаў, і ў Міністэрства транспарту і камунікацый.

- Магу выказаць здагадку, што супольнай камісіі ў працоўных спрэчках ФПБ і Мінсктранса таксама няма. Тады мы пойдзем на прыём да міністра і будзем разбірацца на месцы: хто мае рацыю, а хто вінаваты, - рэзюмаваў Юрый Белякоў.