«Два мільёны чалавек стаіць!»: Літва адзначыла 30-годдзе «Балтыйскага шляху»

Унікальная акцыя стала асновай для далейшага развіцця незалежных краінаў Балтыі.

На гэтым тыдні ў Вільні адзначылі юбілей «Балтыйскага шляху» – унікальнай акцыі, якая адбылася 23 жніўня 1989 года. Тады два мільёны жыхароў Латвіі, Літвы і Эстоніі ўзяліся за рукі і сталі ў жывы ланцуг, які злучыў Талін, Рыгу і Вільнюс.

– Гэта была аснова для далейшага развіцця падзей. Якія б там у Маскве праекты ні развіваліся б, забараніць, усё прыдушыць, – ну куды? Ну як? Два мільёны стаяць! У сутнасці, гэта поўнае нацыянальнае самавызначэнне трох народаў, – успамінае пра падзеі 30-гадовай даўніны старшы навуковы супрацоўнік Інстытута гісторыі Літвы Чаславас Лаўрынавічус у інтэрв'ю ru.delfi.lt.

У мінулую пятніцу Кафедральная плошча Вільні таксама была запоўненая з коптурам. Там праходзіў святочны канцэрт «Хваля адзінства».

Паводле словаў прэзідэнта Гітанаса Наўседы, жыхары Літвы, якія ўдзельнічалі ў Балтыйскім шляху, разумелі, што другога такога шанцу можа і не быць: «Людзі, якія ехалі цэлымі сем'ямі, з сябрамі, маглі рукамі ахапіць некалькі метраў, але сваімі сэрцамі яны адмералі сотні, тысячы кіламетраў. Столькі яны гатовыя былі аддаць свабодзе, барацьбе за свабоду».

23 жніўня 2019 года людзі таксама ўтварылі доўгі ланцуг: ад Кафедральнай плошчы Вільні да вуліцы Укмергес. Гэта была даніна памяці тым, хто дамогся незалежнасці Літвы.

Але казалі і тады, і цяпер не толькі пра палітыку. Кіраўнік Літвы прызнаўся, што падчас «Балтыйскага шляху» зрабіў прапанову сваёй каханай.

– Мы абмяняліся пярсцёнкамі і ўзяліся за рукі. І вось трымаемся за рукі ўжо 30 гадоў – заявіў Наўседа.