У Екацярынінскай царкве Чарнігава маліліся за Беларусь

Богаслужэнне правялі святары Беларускай аўтакефальнай праваслаўнай царквы.

Напярэдадні ў Чарнігаве праходзіла міжнародная канферэнцыя «Беларуская інтэлігенцыя ў падтрымку Беларускай аўтакефальнай праваслаўнай царквы», якая сабрала блізу 150 удзельнікаў, піша «Новы час».

Сярод дэлегатаў на форуме прысутнічалі і святары БАПЦ, у тым ліку кіраўнік царквы арцыбіскуп Святаслаў (Логін) з Нью-Ёрка.

У нядзелю, 18 жніўня, Уладыка Святаслаў разам з протаіерэем Леанідам Акаловічам і іераманахам Вікенціем з Менска правёў набажэнства за Беларусь і Украіну. На набажэнстве прысутнічалі некалькі дзясяткаў гасцей з Беларусі.

Як распавёў пасля службы айцец Леанід Акаловіч, канферэнцыя спрыяла ўмацаванню аўтакефальнага руху ў Беларусі: менскі прыход БАПЦ Святой Еўфрасінні Полацкай, які існуе ўжо 30 гадоў, неўзабаве прырасце новымі прыходамі ў Гомелі, Магілёве, Віцебску і Воршы.