У Кангрэсе ЗША падтрымалі продаж Тайваню знішчальнікаў F-16

Пекін выступае супраць гэтай угоды.

Кангрэс CША павінен неадкладна спрыяць продажу знішчальнікаў F-16 Тайваню на суму 8 млрд даляраў, бо выспа сутыкаецца з ціскам, які зыходзіць ад Пекіна. Пра гэта ў пятніцу заявілі лідары як дэмакратаў, так і рэспубліканцаў у Кангрэсе, піша «Голас Амерыкі».

Кітай асудзіў пагадненне, якое рыхтуецца - на сённяшні дзень адну з найбуйнейшых угод аб продажы амерыканскай зброі Тайваню. Пекін папярэдзіў Вашынгтон аб нейкіх «у адказ кроках», якія будуць у выпадку пастаўкі знішчальнікаў на Тайвань - выспу, якую ўлады КНР разглядаюць як «адколатую правінцыю».

Старшыня камітэта Сэната ў міжнародных дачыненнях рэспубліканец Джым Рыш вітаў продаж Тайбэю знішчальнікаў Lockheed Martin Corp F-16V. «Гэтыя знішчальнікі маюць важнае значэнне для паляпшэння здольнасці Тайваня абараняць сваю суверэнную паветраную прастору, якая знаходзіцца пад усё большым ціскам з боку Кітайскай Народнай Рэспублікі», - гаворыцца ў яго заяве.

Старшыня камітэта Сэната ўзброеных сіл Джым Інхоф і ягоны калега - сэнатар-рэспубліканец Джон Корнін - заявілі, што Тайвань «застаецца важнай мясцінай апоры для бяспекі і стабільнасці» ў рэгіёне. Продаж самалётаў «стрымае агрэсію, улічваючы ўзмоцнены ціск Пекіна і нарошчванне яго вайсковай моцы», гаворыцца ў супольнай заяве.

Кіраўнік камітэта міжнародных спраў Палаты прадстаўнікоў Эліёт Энгель і рэспубліканец Майкл Макол ў супольнай заяве сказалі, што ўгода «пасылае магутны сігнал», які сведчыць аб прыхільнасці ЗША бяспекі і дэмакратыі ў рэгіёне.

Вашынгтон не мае афіцыйных дачыненняў з самакіравальным і дэмакратычным Тайванем, але паводле закону абавязаны даваць яму сродкі для самаабароны. ЗША - асноўны пастаўшчык зброі на Тайвань, і гэтую палітыку падтрымліваюць большасць кангрэсмэнаў.

Кітай ніколі не адмаўляўся ад выкарыстання сілы для ўстанаўлення кантролю над Тайванем і неаднаразова асуджаў продаж амерыканскага зброі Тайбэю.

Афіцыйны прадстаўнік МЗС Кітая Хуа Чунін сказала, што Пекін перадаў у Вашынгтон «сур'ёзную заяву» з нагоды продажу знішчальнікаў. Кітайскае дзяржаўнае інфармацыйнае агенцтва «Сіньхуа» працытавала Хуа, якая назвала ўгоду сур'ёзным парушэннем «прынцыпу адзінага Кітая», згодна з якім Вашынгтон прызнае Пекін, а не Тайбэй. Гэтая пастанова падрывае інтарэсы суверэнітэту і бяспекі Кітая, кажуць у кітайскім МЗС.

Пасля таго як Злучаныя Штаты ў ліпені ўхвалілі продаж танкаў і зенітных ракет Stinger на Тайвань, Кітай заявіў, што «гатовы пачаць вайну», калі людзі «паспрабуюць аддзяліць Тайвань ад краіны». Пекін заявіў, што ўвядзе санкцыі супраць амерыканскіх кампаній, якія ўдзельнічаюць ва ўсіх такіх угодах.