Рэкорд рэкордаў: як беларускі кіроўца без тэхагляду «партызаніць» супраць ДАІ

Самы прынцыповы аўтаўладальнік жыве ў Віцебскай вобласці.

У Беларусі працягваецца дэкада "Дзяржтэхагляд" для выяўлення аўто без тэхагляду. Як вядома, супольнае агульнарэспубліканскае мерапрыемства ДАІ і "Белтэхагляда" аб выяўленні аўтамабіляў без ТА прадоўжыцца да 17 жніўня.

Не так даўно ўправа ДАІ МУС Беларусі назвала антырэкорды тэхагляду за мінулы год. Чамусьці гэтыя звесткі былі практычна не заўважаныя журналістамі, а яны вельмі цікавыя і іх варта згадаць, піша abw.by.

Высветлілася, летась 96 чалавек былі прыцягнутыя да адказнасці па 10 і больш разоў за кіраванне транспартам без тэхагляду.

"З улікам таго, што мінімальны штраф за паўторнасць складае 2 базавыя адзінкі, гэтым злосным парушальнікам было б матэрыяльна выгадна своечасова прайсці тэхагляд", - адзначылі ва УДАІ МУС. І, нарэшце, хто ж ён, рэкардсмэн паводле колькасці штрафаў за адсутнасць ТА?

Рэкардсмэнам стаў 39-гадовы жыхар Віцебшчыны, які прыцягваўся да адказнасці паводле ч. 9 арт. 18.12 КоАП РБ цягам года 17 разоў. Паводле звестак ДАІ, ён заплаціў больш за 1 200 рублёў штрафаў.